香港特別行政區 訴 譚曙光
Read the full judgment text of HCCC 134/2015 on BabelCite. This High Court CFI judgment was delivered on 12 January 2016.
|
HCCC 134/2015 香港特別行政區 高等法院 原訟法庭 刑事案件2015年第134號 ----------------
----------------
---------------------- 判刑 ---------------------- 官： 被告喺聆訊之後，被裁定一項販運危險藥物罪罪名成立，違反香港法例第134章《危險藥物條例》第4（1）（a）及（3）條。 案情指，佢喺2014年10月26日下午，去深圳之後，乘坐中港私家車運送毒品返香港。關員喺截查嗰架私家車嘅時候，發現喺被告攜帶嘅背囊中有十二袋毒品。啲毒品化驗證實之後為內含3.15公斤氯胺酮嘅3.95公斤粉末。其後，關員搜查佢屋企，發現一啲佢自稱係自用嘅「冰」毒以及吸食工具，佢亦都就呢項控罪喺審訊之前認罪，涉及嘅「冰」毒係共0.05克甲基苯丙胺嘅固體粉末及晶狀固體。 被告過往係有十七項嘅刑事紀錄，其中八項係涉及危險藥物，當中有六次係涉及管有危險藥物，兩次係販運危險藥物，最後一次嘅紀錄係喺2014年12月16號，因為涉及一宗管有危險藥物，喺當年5月干犯嘅案件，而被判9個月嘅監禁，即係本案喺該案擔保期間干犯，而就住該案嘅9個月監禁，佢已經服刑完畢。 被告現年52歲。根據大律師所講就係，就住佢被定罪嘅販運危險藥物罪，佢並冇任何嘅求情，但係就住佢已經承認嘅管有危險藥物罪，希望法庭考慮佢喺第一時間已經認罪。 本席喺判刑嘅時候，考慮咗所有本案嘅因素。根據許守城案嘅量刑指引，超過1,000克（即係1公斤）氯胺酮販運嘅量刑起點係超過14年。而根據單松健案件指出，販運3公斤氯胺酮嘅量刑基準係不少於20年。而喺周祐正案中涉及2.89公斤嘅氯胺酮，上訴庭係認同十九年九個月嘅量刑基準。 本案涉及販運危險藥物氯胺酮係3.15公斤，本席係以20年作為量刑基準，並且因為跨境因素，往上調整兩年，判刑22年。就住另外嗰項佢已經承認嘅管有危險藥物罪，由於所管有嘅甲基苯丙胺屬於微量，起刑點係定於12個月，三分之一嘅量刑扣減，判刑8個月。但係由於第一項控罪嘅刑期已經22年，考慮到整體性，下令兩項控罪嘅刑期同期執行。22年。 |