香港特別行政區 訴 劉俊廷
Read the full judgment text of HCCC 452/2015 on BabelCite. This High Court CFI judgment was delivered on 15 January 2016.
|
HCCC 452/2015 香港特別行政區 高等法院 原訟法庭 刑事案件2015年第452號 ----------------
----------------
---------------------- 判刑 ---------------------- 官： 被告承認一項販運危險藥物罪，違反香港法例第134章《危險藥物條例》第4（1）（a）及（3）條。 案情指，警員喺旺角廣東道截查被告，從佢孭住嘅背囊發現兩袋毒品。被告承認因為家中等錢使，想賺少少錢，先至拎嗰兩包K粉去賣，要求警員畀次機會。毒品經過化驗之下，證實為內含280克氯胺酮嘅495克粉末，當時嘅零售價估計為港幣63,360元。 被告現年17歲，過往並冇刑事紀錄。大律師指被告係因為踢波導致到右腳骨折，喺手術休息之後，因為不能長時間走路或站立，好難搵到穩定嘅工作，今次係因為母親同埋姐姐相繼患病，家庭經濟拮据，先至會受人指使，鋌而走險，以為可以藉住販運毒品賺1,300鈫嘅快錢而干犯本案，但係佢喺未收到任何嘅報酬之前已經被截停及拘捕。至於佢嘅腳患，大律師指佢喺扣押期間，骨折嘅螺絲地方亦都有鬆脫，醫生可能會建議佢再做手術。大律師希望本席能夠考慮今次係單一事件，被告對於觸犯法例已經深感後悔，並且第一時間認罪，彰顯悔意，希望本席能夠從輕發落，好讓佢早日獲釋，同家人團聚，佢亦都希望獲釋之後能夠當一名社工，將佢今日嘅經歷和他人分享以及反省。 本席喺量刑嘅時候考慮咗本案嘅案情、毒品嘅種類、毒品嘅重量、有關嘅量刑指引、被告認罪，以及大律師嘅求情，亦都閱讀咗被告以及佢嘅家人等撰寫嘅求情信。根據許守城一案嘅量刑指引，販運50至到300克嘅氯胺酮，起刑點6年至9年，就本案而言係涉及280克氯胺酮。 販運危險藥物屬嚴重罪行，被告家庭經濟情況不屬例外可獲法庭從輕發落嘅情況，就本案案情而言，本席採納8年嘅起刑點，予以三分之一嘅認罪扣減，判刑64個月（五年四個月）。 |