香港特別行政區 訴 呂志鴻及另一人

HCCC 482/2014

香港特別行政區

高等法院

原訟法庭

刑事案件2014年第482號

----------------

----------------

----------------------

判刑
以下內容乃法庭數碼錄音謄本

----------------------

官：　

本案嘅兩名被告人共同係面對一項控罪，就係串謀販運危險藥物罪。

罪行嘅詳情指，佢哋於2014年3月至到4月14日期間，串謀販運毒品氯胺酮。

兩名被告認罪同埋同意案情。因為兩名被告係先後認罪，所以同意案情係有兩份嘅。不過，相關嘅基本案情係相同。簡單嚟講，警方喺2014年4月14日下午時間，喺深水埗大南街見到呂志鴻同一名女子，從一座大廈行出嚟，呂志鴻手上係攞住咗幾個袋嘅。當時李誌賢就已經喺附近等緊，呂志鴻隨後就同李誌賢係交談。

警員上前截停所有人，並在呂志鴻手持嘅袋裡面搵到十多個喇叭，每個喇叭裡面都收藏咗一包毒品嘅。在警誡下，呂志鴻當場向警員承認，啲毒品係「K仔」，有人用12,000鈫嘅月薪請佢運送。至於李誌賢，佢亦在警誡下承認係幫呂志鴻工作，每次可以收取300鈫，而佢就從未收過錢嘅。

其後，兩名被告都各自喺錄影會面中向警方透露犯案嘅背景同埋過程。呂志鴻話係一個叫阿布嘅人招攬佢去販毒，亦係阿布提出叫佢介紹朋友幫手。於是，佢就介紹咗李誌賢加入，佢知道李誌賢每次幫手，可以得到幾百鈫嘅報酬。李誌賢方面，佢就向警員講，呂志鴻在事發前三日先至叫佢幫手去運送氯胺酮，每次送貨佢話會有300鈫嘅酬勞。今次事件中，呂志鴻主要叫佢做「睇水」，見到警察就要通知佢。佢今次係第一次做嘅。

今次涉及嘅氯胺酮，實質嘅份量有2,530克，零售價係港幣約為三十四萬鈫。

呂志鴻係出生於1994年9月14日，現時係二十一歲幾，佢有兩次嘅刑事紀錄，就同毒品係無關嘅。佢在內地出生，06年先至移居香港，以前做過廚房嘅兼職同埋貨車嘅工人。佢話自己係並冇毒癮。

李誌賢就係喺香港出生，今年18歲，以往並冇刑事紀錄，讀書係讀到初中，做過髮型屋嘅散工。

就今次嘅事件，控方要求法庭引用法例第56A條，去調高呂志鴻嘅刑期，因為係佢招攬咗當時只有17歲嘅李誌賢去幫手運毒，本席會稍後處理呢一點。

呂志鴻係由莊大律師代表嘅。喺莊大律師求情嘅時間，佢指出在案發時，呂志鴻本身都係只得20歲，都屬於係年輕，其實兩名被告佢哋年紀嘅差別都唔係太遠。被告在事發時同家人一齊住嘅，但係生活環境並不理想，被告都係畀人利用去犯案嘅。在咁嘅情況下，大律師認為，法庭係唔應該加佢刑，而且佢並非係始作俑者。大律師呈上咗案例，同埋建議本案嘅刑期起點應該係19年。

李誌賢就係由張大律師代表。在求情時，張大律師就強調，被告今年都只係18歲，佢以往並冇刑事紀錄嘅，佢一直係同家人居住，讀書讀到中二而輟學，之後一直有搵嘢做嘅。被告今次係被誘導而協助販毒，佢嘅角色只係「睇水」。張大律師希望法庭接納，控罪雖然係串謀，但係實質都係一次販運毒品案。張大律師都建議法庭接納19年為刑期起點，並給予被告全數三分一嘅扣減。

本席係先取得背景報告作為參考嘅，本席亦都已經睇咗報告嘅內容。

以下本席會先處理李誌賢嘅判刑。本案嘅毒品份量係2,530克嘅氯胺酮，考慮到單松健及周祐正判例，本席決定接納，恰當嘅刑期起點係19年。

李誌賢承認控罪，本席會畀佢三分一嘅扣減，刑期變成十二年八個月。李誌賢喺犯案嘅時間仲係比較年輕，今次亦係佢嘅初犯。雖然上訴庭都曾經講過，呢兩點並非係好有力嘅求情因素，但係經考慮後，本席決定酌情將刑期減4個月，希望被告真係可以在服刑期間努力學習，刑滿之後能夠重新做人。所以李誌賢嘅刑期係十二年四個月。

至於呂志鴻方面，基於本案嘅案情與及承認事實，雖然被告冇話用乜嘢欺壓嘅手法去強逼李誌賢，但係李誌賢確實係經呂志鴻而參加咗今次嘅販毒。本席認為《毒品條例》第56A條係適用於本案嘅，本席會將刑期上調。但係另一方面，本席亦都考慮到呂志鴻喺犯案嘅時間，本身都相對年輕，而背後安排同埋指使嘅係另有其人，本席認為加刑9個月應該足夠；亦即係話，呂志鴻嘅刑期起點係十九年九個月。本席亦會給予三分一嘅扣減，因此刑期係十三年兩個月。本席理解，被告有試圖去協助警方，係畀咗一份口供，雖然個結果係冇乜嘢作用，但係本席會將刑期減為13年。希望被告能夠好好反省，特別係今日法庭見到佢老師寫嘅一封信，被告喺中二嘅時間成績應該唔係好理想，但係老師到現時都願意關心佢同埋去探佢。被告喺刑滿之後必定唔可以再重蹈覆轍。

因此，呂志鴻嘅刑期係13年，李誌賢嘅刑期係十二年四個月。