香港特別行政區 訴 彭俊傑

HCCC 165/2015

香港特別行政區

高等法院

原訟法庭

刑事案件2015年第165號

----------------

----------------------

判刑

以下內容乃法庭數碼錄音謄本

----------------------

官：　

被告人被控告一項販運毒品罪，涉案嘅毒品係約呢個25克嘅「冰」毒，被告承認控罪，並同意嗰個案情撮要嘅。

簡單講，警方係喺案發嘅晚上十點幾喺寶田邨裡面截停搜查被告，警員喺被告孭住嘅袋裡面先係搵到兩包嘅毒品，被告承認話係「冰」毒，仲話係自用嘅。之後，警員喺被告屋企搵到另一個膠袋，裡面有大概1克嘅毒品，而呢個嘅毒品已經係包括咗喺控罪所指嘅毒品數量裡面㗎喇。除此之外，警方亦都喺被告嘅單位裡面搵到好多嘅透明膠袋同埋一個電子磅。在警誡下，被告向警員講膠袋係用嚟分開包裝嗰啲毒品，部分自用，其他拎去賣，幫補生計，因為佢以前有工傷，做唔到嘢。以警方嘅估計，所有毒品嘅市值大概約為係港幣萬一鈫。

被告今年45歲，有兩次嘅刑事紀錄，即係06年嘅藏毒案，與及11年嘅「洗黑錢」案。代表被告嘅羅大律師喺求情嘅時候指出，被告係離咗婚，有兩個女兒，亦都係成年人嚟㗎喇。佢自己喺08年嘅時候受咗工傷，所以之後喺搵工作方面係有困難嘅。喺2011年嘅監禁之後，被告有盡力去工作，直到佢因為本案而被拘捕嘅時間，佢都有做散工嘅。大律師指出，被告話自己係吸毒者，06年嗰次都係因為「冰」毒而被判入戒毒所。喺被拘捕之後，懲教署在例行檢查嘅時候都驗到佢有吸食過「冰」毒嘅，呢方面係大律師有呈交咗相關嘅文件係去畀法庭參閱嘅。大律師提到，被告一個星期大概服用係兩至到三克嘅「冰」毒。大律師陳詞指，今次嘅毒品應該有三分一到一半會係被告自用嘅。本席已經即時向大律師講明，本席唔會喺冇證據支持下，接納今次被告係有嗰三分一到一半自用嘅講法。大律師在取得進一步嘅指示之後表示，被告唔會就呢一方面係上證人台作供或者傳召證人，大律師要求本席基於本案嘅證據去作出自用比例方面嘅評估。

本案涉及25.92克嘅「冰」毒，根據案例嘅指引，刑期基準本席認為應該係定喺七年九個月。被告認罪，可以得到三分一嘅扣減，因此刑期變為五年兩個月。考慮到被告嘅背景，本席接納佢自己都係吸食「冰」毒嘅人，呢一方面可以從佢嘅刑事紀錄、曾經入過戒毒所同埋懲教署嘅驗尿檢查報告中反映到。本席係不能排除有部分「冰」毒係被告自用嘅呢個可能性，但係考慮到被告屋企搵到嘅工具與及咁多嘅膠袋，咁本席認為呢啲毒品大部分都係用嚟販運，而唔係佢自用嘅。再者，管有毒品就算係自用，其實都係犯法，法庭亦都要顧及自用毒品之中都有分發流通嘅危險性。

經過衡量之後，本席只係會將刑期再減六個月去反映自用嘅因素，因此判刑會係四年八個月。