香港特別行政區 訴 張仲言

HCCC 186/2016

香港特別行政區

高等法院

原訟法庭

刑事案件2016年第186號

----------------

----------------

------------------------------

判刑
以下內容乃法庭數碼錄音謄本

------------------------------

官：　

被告人承認咗一項販運毒品罪，涉及係112克嘅氯胺酮。

被告人亦都承認控方嘅案情撮要。本案嘅情況其實比較簡單，警員喺案發當天，去到上水清河邨一個單位外面，首先截停咗被告人，再帶佢返去佢單位進行搜查。及後，喺被告床邊嘅櫃裡面搵到相關嘅毒品同埋包裝工具。

在警誡下，被告係即時承認控罪，指出佢係因為經濟壓力之下，先至利用販毒去搵錢。被告喺錄影會面時，亦都將犯案背景向警方交待。

撿獲嘅毒品市值當時大約係港幣三萬六鈫。

被告今年21歲，佢讀過職業局嘅技工課程，佢以往係並冇犯罪紀錄。

代表佢嘅劉大律師喺求情時間提到，被告嘅妻子喺情緒方面有問題，兒子出世之後，妻子嘅情況都未有改善。被告佢自己失業，母親又有病，最後被告先至作出錯誤嘅選擇，希望法庭輕判。

以本席嘅理解，雖然香港嘅經濟冇以前咁興旺，但係要搵一份工作照計並非困難，就算係搵唔到長工，一啲嘅兼職都應該係可以搵到。我相信被告失業好大嘅原因，係佢自己對工作揀擇或者怕辛苦，所以變成係長期失業。就算喺最差嘅情況嚟講，其實被告申請公援都總好過利用毒品去搵錢嘅。如果話被告嘅母親有病，被告想搵快錢幫佢醫治，唔通咁被告就可以利用害人嘅毒品去搵錢醫佢媽媽？如果係咁，就算佢媽媽係好番，佢都唔會話好快樂。其實本席最同情同埋覺得可憐嘅，係被告咁細嘅兒子，佢咁細個就要面對家人分離嘅痛苦。希望被告喺今次嘅教訓之後，為咗佢母親同埋佢兒子，真係要重新做人。

本席在考慮後，會以六年半作為刑期起點。本席會給予被告因為佢嘅認罪全數三分一嘅扣減，刑期會變成四年四個月。被告初犯，亦總算係相對年輕，本席會酌情再減刑兩個月。

最後嘅刑期係四年兩個月。