香港特別行政區 訴 區俊立

HCCC 370/2015

香港特別行政區

高等法院

原訟法庭

刑事案件2015年第370號

----------------

----------------

----------------------

判刑

以下內容乃法庭數碼錄音謄本

----------------------

官：　

被告承認一項販運危險藥物罪，違反香港法例第134章，《危險藥物條例》第4（1）（a）及（3）條。

案情指，被告步出一屋苑側門嘅時候畀警員截查，喺佢左膊孭住嘅斜孭袋內發現十九多袋嘅毒品，被告喺警誡下指毒品係佢替他人上屋苑單位攞嘅，佢會獲得分部分嘅「K仔」自用。毒品經過化驗之後，證實為內含27.59克氯胺酮嘅33.38克嘅粉末，同埋19.65克晶狀固體，內含19.31克甲基苯丙胺鹽酸鹽，以及十片內含0.1克硝甲西泮嘅片劑。本案嘅「冰」毒約市值4,206元，氯胺酮嘅市值大約係8,351元，而硝甲西泮片劑嘅市值係港幣450元，即係話所有嘅毒品零售市值估計係港幣13,007元。被告承認有吸服「K仔」嘅習慣。

被告現年31歲，之前有七項嘅定罪紀錄，涉十項嘅控罪，其中四項同毒品有關，最後一次係喺2012年2月，因為管有毒品同埋危險藥物，所以被判感化令12個月，但係其後因為違反感化令被判到戒毒所服刑。

大律師喺求情嘅時候指，被告離咗婚，同前妻育有一女，佢喺2002年染上吸服「K仔」嘅惡習，而今次係受人唆擺，一時貪心，想獲得「K仔」嚟服食，先至會鋌而走險，干犯本案。大律師亦都指，被告一截停嘅時候已經將事件和盤托出，同警方充分合作，第一時間認罪，希望本席予以輕判。

本席喺量刑嘅時候考慮咗本案嘅案情、唔同毒品嘅種類、重量、有關嘅量刑指引、被告認罪同埋大律師嘅求情，無疑本案嘅主要毒品係「冰」毒，19.31克嘅量刑基準係納入10至到70克，即係7至到11年嘅界別。氯胺酮嘅重量係27.59克，量刑基準係納入10至到50克，即係4至到6年嘅界別。用組合嘅量刑，所有嘅毒品重量係46.9克，即係假設毒品全部係「冰」毒，量刑基準應該為約八年半。如果假設毒品全部係氯胺酮，則量刑基準應為約六年。就本案而言，本席認為一個8年嘅量刑基準係合適嘅，而嗰0.1克硝甲西泮嘅份量輕微，係不會令致到判刑進階至另一界別。

大律師亦都指部分嘅毒品係被告自用嘅，咁但係根據Wong Suet-hau一案，案件證據中必須可以見到，顯而易見，並且係比較可觀嘅部分係由被告自用嘅，雖然本案中大律師力陳被告喺警誡下已經表明會獲部分「K仔」自用，咁但係極其量都係一啲少量，而本席唔認為本案證供，例如包裝上可以睇到有任何可觀同埋顯而易見嘅部分係被告自用，咁所以本席唔會再給予額外嘅扣減，只係予以三分之一嘅認罪扣減，判刑64個月。