香港特別行政區 訴 伍沛賢
Read the full judgment text of HCCC 477/2015 on BabelCite. This High Court CFI judgment was delivered on 2 March 2017.
|
HCCC 477/2015 香港特別行政區 高等法院 原訟法庭 刑事案件2015年第477號 ----------------
----------------
---------------------- 判刑 ---------------------- 官： 被告人喺席前承認一項販運危險藥物控罪，違反《危險藥物條例》嘅第4條。 案情撮要顯示，係喺2015年3月11日，警方係進入青山公道古洞段一屋苑嘅其中一個單位。警員喺呢個單位裡面進行搜查，佢哋發現被告人當時係同佢嘅女朋友，係喺其中一間嘅睡房裡面，警員喺睡房裡面係搜得總共重96.85克嘅「冰」毒，另外亦都係有大量嘅可再封膠袋、電子磅，同時警員亦都係搜獲一啲吸食「冰」毒嘅工具。 被告係被警員拘捕。喺警誡之下，被告人向警員表示，喺睡房裡面搜到嘅「冰」毒、電子磅同埋可再封膠袋都係屬於佢，而事件與佢女朋友係無關。 涉案「冰」毒嘅零售價約值係港幣四萬鈫。 而被告人大律師喺上一次求情嘅時候就表示，被告人亦都有係服食呢個「冰」毒嘅習慣，佢每日係需要吸食大約一克嘅「冰」毒。 根據上訴庭嘅判刑指引，販運70至300克嘅「冰」毒，量刑嘅起點應該係11至15年嘅即時監禁。即使喺搜獲嘅96.85克「冰」毒裡面，有26.85克係自用嘅話，被告人所面對嘅刑期應仍然係唔少過11年即時監禁。不過，今次並非被告人第一次干犯係呢一個控罪，佢喺2011年已經因為係干犯相同嘅控罪，而被判處兩年十個月嘅即時監禁，似乎被告人並冇係吸取過往嘅教訓。 基於今次已經唔係被告人第一次干犯呢一個刑事控罪，另外再加上即使係有部分嘅「冰」毒自用，管有危險藥物本身亦都係一項嘅刑事控罪。有鑒於此，本席係將量刑嘅起點上調至到12年即時監禁。因為被告人係承認控罪，故此佢係被判處8年嘅即時監禁。 |