香港特別行政區 訴 楊國輝

HCCC 458/2016

香港特別行政區

高等法院

原訟法庭

刑事案件2016年第458號

----------------

----------------

----------------------

判刑
以下內容乃法庭數碼錄音謄本

----------------------

官：　

被告人喺裁判官席前承認一項販運危險藥物罪，被交付高等法院原訟法庭判處。

本席喺判處嘅時候考慮咗整體情況，包括案件嘅性質同埋情節，尤其是相關危險藥物嘅種類同埋份量、被告人嘅個人背景同埋辯方大律師嘅求情陳詞。

本案嘅案情係簡單，當被告人駕駛住一部私家車駛進天耀邨停車場嘅時候被截停，警員喺該私家車嘅司機座位旁邊嘅車門儲物箱裡面搜出涉案嘅「K仔」，被告人當時聲稱嗰啲危險藥物係用嚟自用。

被告人現年20歲，中三程度，曾經做過五金廠同埋地盤雜工，案發前大概一個月失咗業。被告人並非初犯，但係之前干犯嘅都係同駕駛相關嘅罪行，佢喺2016年4月被判兩個月監禁，緩刑12個月，亦都被罰款同埋停牌，佢從未干犯過同危險藥物有關嘅罪行。

辯方李大律師求情嘅時候指出，被告人係一名孝順嘅兒子，喺有工作嘅時候會將大約15,000元嘅工資交一半畀佢母親，被告人嘅母親喺被告人大概兩歲嘅時候同嗜賭嘅丈夫離婚，之後獨力撫養被告人同埋佢嘅姐姐。母親喺地盤當散工，工作勞累，因此對被告人疏於管教。被告人嘅學業成績唔好、性格內向，喺中三輟學之後誤交損友，亦都間中有服用「K仔」。

李大律師亦都指出，被告人喺案發前半年多交上女朋友，支出多咗，欠下財務公司的款項超過100,000元，備受經濟壓力。涉案嘅危險藥物係一名朋友賣畀被告人，因為價錢十分便宜，所以被告人買咗呢個份量，買嘅時候仲未想清楚會如何處理呢批毒品，最終先至決定為咗販運用途。

辯方呈遞咗被告人親筆寫嘅信件，亦都呈遞咗母親同埋家姐寫嘅信件，喺信件裡面，被告人表示深切悔意、決心改過自新，會喺獄中學習，以備重投社會。母親同埋家姐都話被告人嘅本質係好，替被告人求情，並表示會支持佢。李大律師請法庭顧及被告人第一時間承認控罪，喺案發嘅時候只得19歲，被捕之後亦都曾經向當局提供協助，希望法庭盡量輕判。

被告人販運嘅危險藥物係俗稱「K仔」嘅氯胺酮，份量係內含169克氯胺酮嘅255克固體。根據律政司司長訴許守城（[2009] 1 HKLRD 1），販運「K仔」純含量50至300克嘅人，應該考慮判處6至9年監禁，本席不認為案中有足夠嘅理由應該偏離量刑指引。

考慮咗整體情況，本席認為採用七年三個月作為量刑基準係恰當。被告人承認控罪，應該得到三分一嘅刑期扣減。顧及整體情況，包括辯方大律師嘅求情，本席認為可以給予被告人多一個月嘅刑期扣減。

被告人請起立。基於上述理由，本席判你就本案控罪監禁四年九個月。