香港特別行政區 訴 呂永為

HCCC 47/2017

香港特別行政區

高等法院

原訟法庭

刑事案件2017年第47號

----------------

----------------

----------------------

判刑
以下內容乃法庭數碼錄音謄本

----------------------

官：　

被告人喺一名裁判官席前承認一項販運危險藥物罪，被交付高等法院原訟法庭判處。喺判處嘅時候，本席考慮咗整體情況，包括案件嘅性質同埋情節，尤其是相關危險藥物嘅種類同埋份量、被告人嘅個人背景同埋辯方大律師嘅求情陳詞。

本案嘅案情可以簡述如下：當被告人從羅湖管制站從內地進入香港嘅時候，因為被懷疑體內藏有危險藥物被送往醫院。稍後，被告人喺醫院裡面排出咗兩個膠套，其中一個膠套裡面有兩個小包，載有內含43.60克海洛英鹽酸鹽嘅共55.90克混合劑；另外一個膠套裡面有七個小包，載有內含146克海洛英鹽酸鹽嘅共195克混合劑。

被告人被拘捕，喺警誡之後話佢係幫人喺大陸帶啲毒品嚟香港，只係諗住賺啲錢，對方承諾畀佢5,000元嘅報酬。喺回港之前，被告人將涉案嘅毒品塞入佢自己嘅肛門之內。佢至今仍然未收到承諾咗嘅5,000元報酬。

被告人現年41歲，中二程度，曾經任職冷氣學徒、車房學徒、跟車工人同埋倉務員。佢已婚，育有一名15歲嘅女兒。被告人有多次定罪紀錄，包括盜竊同埋兩次管有危險藥物罪，其他嘅定罪多數都係同駕駛有關。

辯方梅嫣華大律師喺求情嘅時候強調，被告人被拘捕嘅時候已經坦誠招認，喺法庭亦都第一時間承認控罪。辯方呈遞咗被告人親筆寫嘅信件，喺信件裡面，被告人表示悔意，並且承諾不再犯任何罪行。辯方亦都交咗文件，被告人簽署咗會願意捐贈器官。梅嫣華大律師指出，被告人有八十多歲嘅高堂，佢係一名孝順嘅兒子，但係因為學歷不高，所以工作收入有限，喺咁嘅情況之下，一時受到誘惑，愚蠢咁樣為咗金錢犯下大錯，至今都未收到報酬。被告人對將毒品交畀佢嘅人嘅認識好少，因此難以對當局嘅調查提供實質嘅幫助，但係已經盡量合作。被告人知道佢帶嘅係毒品，但係唔知道係咩嘢種類，亦都唔知道份量。被告人嘅妻子係內地人，正在申請來港。被告人嘅女兒正在求學，成績唔錯。被告人亦都擔心佢未能夠再見到佢年老嘅母親，希望法庭能夠輕判，令到家庭早日團聚。

被告人販運嘅危險藥物係總共內含189.60克嘅海洛英鹽酸鹽嘅250.9克混合劑，根據上訴庭案例英皇訴劉德明（[1990] 2 HKLR 370），販運海洛英如果純含量係50至200克嘅話，應該考慮8至12年嘅監禁。案例亦都指出，如果案件涉及跨境因素，應該加刑。考慮咗本案嘅整體情況，本席唔見得有偏離量刑指引嘅充分理由。案例亦都明確指出，即使帶毒者唔知道所帶嘅係邊一種類同埋幾多份量嘅危險藥物，法庭都應該以涉案危險藥物嘅種類同埋份量去考慮判處。

考慮過整體情況，本席採用十一年半作為最初嘅量刑基準，因為被告人從內地將危險藥物帶嚟香港，本席認為需加刑半年，最終嘅量刑基準會係12年。被告人承認控罪，應該得到三分一嘅刑期扣減，顧及整體情況，包括辯方大律師嘅求情陳詞，本席認為呢個就係被告人應得嘅刑期扣減幅度。

被告人，請起立。基於上述理由，本席判你就本案控罪監禁8年。