香港特別行政區 訴 馮浩麟
Read the full judgment text of HCCC 44/2017 on BabelCite. This High Court CFI judgment was delivered on 24 April 2017.
|
HCCC 44/2017 香港特別行政區 高等法院 原訟法庭 刑事案件2017年第44號 ----------------
----------------
---------------------- 判刑 ---------------------- 官： 被告承認一項販運危險藥物罪，違反香港法例第134章《危險藥物條例》第4（1）（a）及（3）條。 案情指，被告攜著兩個紙箱落的士嘅時候被警員截查，佢將紙箱丟在地上，試圖逃走，但係被制服。警員發現紙箱入面共有八包危險藥物，而有關嘅毒品經過化驗，證實為內含1,904克甲基苯丙胺鹽酸鹽嘅1,980克嘅晶狀固體，市值718,740元。被告喺警誡下承認替老闆運送毒品可以獲得5,000元嘅報酬，佢預備租用酒店嘅房間存放毒品。 被告現年17歲，共有兩項嘅刑事紀錄，最後一項喺2014年4月10號，因為縱火罪被判感化18個月。 大律師喺求情嘅時候表示，被告喺年幼嘅時候父母已經離異，父母均冇給予適當嘅指導畀佢，佢今次係因為誤交損友先會為咗找快錢而鋌而走險，干犯本案。而佢喺扣押之後已經深切反省，並且打算利用在囚嘅時間重新讀書，以便佢刑滿出獄之後有一技之長，可以重投社會。 本席喺量刑嘅時候考慮咗本案嘅案情、毒品嘅種類、重量同埋量刑嘅指引，亦都考慮咗被告喺裁判署已經承認控罪，亦都考慮大律師嘅求情及閱讀咗被告母親所撰寫嘅求情信。 根據譚伊真一案，販運多於600克「冰」毒嘅量刑指引沿用Abdallah一案就販運海洛英鹽酸鹽嘅指引，即係1,200至到4,000克，起刑點係23至26年。就本案所涉及嘅1,980克「冰」毒，本席以23年作為起刑點，予以三分之一嘅認罪扣減，判刑十五年四個月。 |