香港特別行政區 訴 朱昌濠

HCCC 81/2017

香港特別行政區

高等法院

原訟法庭

刑事案件2017年第81號

----------------

----------------

----------------------

判刑
以下內容乃法庭數碼錄音謄本

----------------------

官：　

被告人喺裁判法院承認一項販運危險藥物罪，被交付高等法院原訟法庭判處。

本案嘅案情係簡單，被告人喺街上面被截停，當時佢身上面有涉案嘅毒品，係內含82.4克甲基苯丙胺鹽酸鹽嘅84.2克晶狀固體。喺被捕之後，被告人招認嘅係為咗500元嘅報酬，替別人運送呢一啲危險藥物。

被告人現年22歲，中一程度，曾經任職餐廳嘅員工同埋貨倉工人，佢同家人同住，佢並冇刑事定罪紀錄。

喺求情嘅時候，辯方趙大律師強調，被告人係初犯，佢亦都喺第一時間承認控罪。趙大律師亦都告知法庭，被告人係顧家嘅人，當佢有工作嘅時候，月入大概10,000元，就會將大概4,000元係畀屋企做家用。後嚟不幸因為工傷失去工作，加上學歷低，所以未能夠找到新嘅工作，失業已經大概一年，情況令到自己同埋家庭喺經濟上遇上好大嘅困難，被告人覺得有愧於家庭，喺咁嘅情況之下受唔住誘惑，先至為咗賺取快錢而犯案，被告人而家已經心存悔意，並且親自寫信係表達佢嘅悔意。

被告人販運嘅係「冰」毒，根據上訴法庭嘅案例譚伊真（CACC 524/2011），販運「冰」毒如果純含量係70至300克嘅話，應該考慮判處11至15年嘅監禁刑罰。

考慮咗整體情況，本席不見有可以偏離量刑指引嘅因素，本席會採用11年作為量刑基準，被告人承認控罪同埋有悔意，應該得到三分一嘅刑期扣減。喺考慮咗整體情況，顧及辯方大律師嘅求情陳詞之後，本席認為，呢個就係被告人應得嘅刑期扣減幅度。

基於上述理由，本席判你就本案控罪監禁七年四個月。