香港特別行政區 訴 丘裕鵬

HCCC 484/2016

香港特別行政區

高等法院

原訟法庭

刑事案件2016年第484號

----------------

----------------

----------------------

判刑

以下內容乃法庭數碼錄音謄本

----------------------

官：　

被告人喺裁判官席前承認一項販運危險藥物嘅控罪，之後根據有關嘅程序轉介原訟法庭進行判刑。

罪行嘅詳情指被告人喺2016年7月7號，喺呢個新界將軍澳嘅欣景路8號新都城第2期L1層1017號鋪外，非法販運危險藥物，即係內含597克氯胺酮嘅1,033克粉末。

案情嘅撮要就係話，被告人案發嘅時候，其實就喺呢一個1017號鋪外面使用緊佢嘅手提電話，期間就係畀當其時進行反毒品巡邏嘅警員截查。警員表露身分之後，就問被告人點解喺嗰度同埋佢喺邊度住嘅，跟住被告人就開始顫抖，同埋垂低咗佢嘅頭，然後喺附近嘅後樓梯佢被搜查，喺佢當其時攜帶住嘅一個背包裡面搜到一個白色嘅膠袋，裡面有另外四個膠袋，而裡面亦都裝住有關今次案件裡面嘅危險藥物。

警方於是以販運危險藥物控罪嘅罪名拘捕咗被告人。警誡之後，被告人就話，佢係收人2,000鈫嘅酬勞，幫人帶嗰啲嘅「冰」毒，係佢當其時用「冰」個字眼嘅。

喺後來嘅警誡錄影會面紀錄裡面講，被告人就透露，佢就其實係當日嘅下晝6點鐘嘅時候，其實收到一個叫做阿興嘅人打電話畀佢，而呢個阿興就係佢之前一個月左右結識嘅，呢個阿興就叫被告人送嗰啲「冰」，就畀佢兩千鈫，被告人就同意咗嘅。然後一如嗰個阿興嘅指示，被告人就喺呢一個嘅土瓜灣宋王臺花園嗰個嘅花槽嗰度，就攞起咗嗰個膠袋嘅，打開膠袋見到裡面有四包佢當其時以為係「冰」毒喺裡面嘅，跟住佢就坐的士去咗呢一個嘅新都城第2期，然後期間就係等候人哋再打電話畀佢話嚟收毒品，但係嗰個時候就畀警察拘捕咗嘅。因此，被告人係仲未收到嗰個2,000鈫所謂嘅報酬。

有關嘅毒品當其時估計嘅巿值係245,854鈫。

被告人係冇之前任何刑事定罪紀錄。佢將會大概應該係八日之後就係轉25歲，所以喺干犯控罪嘅時候仍然都係24歲。

喺求情嘅過程裡面，我就收到一系列嘅信件，就睇晒啲內容，亦都得知呢一個被告人嘅家人、佢嘅前僱主、前校長等等對佢嘅睇法。

有關判刑嘅指引，有關販運氯胺酮嘅判刑指引就係喺案例SJ對Hii Siew Cheng（許守城）（CAAR 7/2006）呢個案件裡面所判定。經過審訊之後被定罪，販運300至到600克嘅氯胺酮嘅判刑範圍係9至到12年嘅監禁。

有關判刑方面，首先指出，販運危險藥物最高嘅刑期係終身監禁同埋罰款$5,000,000。喺我哋呢個案件裡面，涉及嘅氯胺酮份量係接近600克，係597克，一個合適嘅判刑起點應該係稍為低於12年。喺呢度我亦都想順帶指出就係話，若然被告人當日佢以為自己攜帶係「冰」毒，若然嗰啲真係「冰」毒，佢同意去運送呢啲「冰」毒的話，今天被告人所面對嘅刑期嗰個判刑起點係接近20年，接近20年嘅，同樣嘅份量就會係接近20年嘅判刑起點。我嘅睇法，亦都係我嘅裁斷，我認為被告人不能倚賴佢嘅所謂年輕嘅年紀，作為佢嘅求情因素。干犯控罪嘅時候，佢已經24歲，而且之前喺不同嘅崗位度工作過，亦都清楚知道社會點樣運作嘅，佢亦都知道佢將會係為別人去送毒品，嚟到去賺取一啲嘅酬勞，佢甚至以為嗰啲係「冰」毒添，但係佢仍然決定選擇去咁樣做，而且只係兩千鈫嘅酬勞，呢啲錢對佢當其時所欠嘅五十幾萬，或者後來我透過佢嘅屋企人，包括爸爸喺附件6裡面嗰個信件裡面所寫，後來似乎還到去應該相差仲係二十幾萬嘅，仲係欠緊，就算係呢啲嘅銀碼，嗰兩千鈫對佢嘅還款根本係冇乜重大幫助，而且呢個並不能夠成為佢干犯呢個控罪嘅藉口，佢必須就住佢所做嘅呢個決定，承擔所有嘅後果。

雖然係咁樣，我睇過所有嘅求情信之後，我係清楚咁見到一個好慷慨、好良善嘅、同埋能夠希望幫助到別人嘅人。而喺佢讀書嘅時候，雖然佢嘅考試成績嗰啲可能唔係話最好，但係亦都好積極咁參與所有校內嘅活動，所以校長先至對佢咁深刻嘅印象，同埋咁嘉許佢。亦都喺信件裡面睇到，被告人係接觸所有嘅人裡面，都令到別人對佢有好感同埋有正面嘅評語，無論係佢學校嘅人或者佢家人，甚至包括佢以前所工作過嘅地方嘅人都係一致好評，對佢嘅人品，呢個反映到被告人之前一直係一個正面嘅、良好品格嘅。有一個可惜就係話，見到個文件裡面顯示，同埋求情裡面聽到話，被告人佢係曾經報讀一個公開大學嘅護理課程，但係就唔知點解，就未能夠完成。我喺呢度懇切咁樣希望被告人喺未來嘅日子，喺你嘅還押期間，唔好浪費呢啲嘅時間，你仍然可以嘗試去揀番一啲合適嘅課程嚟到去報讀，嚟到準備將來你重新融合社會嘅時候做一個有用嘅人。

由於被告人喺呢個案件裡面只係一個低層次嘅帶貨嘅角色，由於被告人冇任何之前刑事定罪紀錄，就住呢個判刑起點，我會係採納141個月嘅判刑起點，141個月嘅判刑起點。就住干犯控罪嘅過程裡面，我睇唔到有任何其他嘅加刑因素。相反地，由於被告人之前嘅正面良好品格，我係會就喺呢一個141個月嘅判刑起點裡面扣減3個月嘅刑期，扣減3個月嘅刑期。另外，由於被告人係適時咁樣去承認控罪，亦都給予佢三分之一嘅量刑扣減。

因此，最後嘅刑期喺扣減晒之後就係92個月，又或者係七年零八個月嘅監禁，七年零八個月嘅監禁。