香港特別行政區 訴 嚴文王
Read the full judgment text of HCCC 241/2016 on BabelCite. This High Court CFI judgment was delivered on 17 October 2017.
|
HCCC 241/2016 香港特別行政區 高等法院 原訟法庭 刑事案件2016年第241號 ----------------
----------------
---------------------------------------- 判刑 ---------------------------------------- 官： 被告承認一項販運危險藥物罪，違反香港法例第134章《危險藥物條例》第4（1）（a）及（3）條。 案情指，被告喺街上被警員截查，警員其後喺佢嘅左前褲袋搜出一包「冰」毒，被告喺警誡之下稱，嗰包「冰」毒係佢買嚟自己食嘅，佢當時身上係有現金二百多元，而毒品經過化驗之後，證實為27.3克晶狀固體，內含26.3克甲基苯丙胺鹽酸鹽，市值8,982元。被告現在承認佢管有嗰啲毒品係作販運用途。 被告現年25歲，共有六項刑事紀錄，其中三項同毒品有關，最後一次嘅刑事紀錄喺2012年6月，因為管有危險藥物被判到戒毒所服刑。大律師喺求情嘅時候表示，被告嘅父親喺佢14、15歲嘅時候已經去世，而母親患有精神病，因為疏於管教，而被告係誤交損友先至會吸食毒品，至今已經有十多年。大律師指，被告坦白認罪，並且承諾會喺獄中戒除毒癮以及學一門手藝，準備出獄之後自食其力，融入社會，希望本席輕判。 本席喺量刑嘅時候考慮咗本案嘅案情、毒品嘅種類、重量、有關嘅量刑指引、被告承認控罪，以及大律師嘅求情。本案涉及嘅係26.3克甲基苯丙胺鹽酸鹽，而根據譚伊真案頒下嘅量刑指引，販運10至到70克，起刑點係7至到11年。就住本案嘅案情同埋有關嘅「冰」毒重量，本席認為8年嘅起刑點係適合嘅，予以認罪嘅三分之一量刑扣減，判刑64個月，即係五年四個月。 |