香港特別行政區 訴 吳紹鋒

HCCC 134/2016

香港特別行政區

高等法院

原訟法庭

刑事案件2016年第134號

----------------

----------------

-------------------------------------------

判刑
以下內容乃法庭數碼錄音謄本

-------------------------------------------

官：　

被告人喺席前承認一項販運危險藥物嘅控罪、一項管有危險藥物嘅控罪同埋一項保管或控制偽製流通紙幣嘅控罪。

控情撮要係指，喺2015年8月9日晚上，被告人被警員截停嘅時候，佢係轉身逃走，而喺逃走嘅過程中，被告人將兩包白色嘅物體拋往地上，佢最終係被警員制服。

跟住被告人係被帶番去屋企搜查。喺被告人所著嘅褲袋裡面，警員係搜得八張500鈫嘅滙豐銀行偽鈔、七張100鈫嘅中國銀行偽鈔，另外亦都有一啲係被移除咗螢光線嘅20元嘅真鈔。喺被告人嘅居所裡面，警員亦都係搜到一個膠袋，裡面藏有白色懷疑係屬於「冰」嘅毒品，另外亦都搵到一啲吸食嘅工具。另外，警員亦都喺居所裡面係搜到製作偽鈔嘅打印機、墨水、𠝹刀、電腦等嘅工具，同埋有另外兩張只係有單面嘅500元偽鈔。

被告人拋出去嘅兩包白色物體，後來經過政府化驗所嘅檢驗之後，證實係50.80克嘅「冰」。至於喺屋裡面搜獲嘅白色懷疑「冰」毒嘅毒品，後來亦都被證實係2.23克嘅「冰」。而涉案嘅毒品嘅總零售價就係約為一萬七千港元。

根據上訴庭嘅量刑指引，販運50克嘅「冰」，量刑嘅起點就約為九年零六個月，我將佢變咗做九年零六個月。至於管有少量嘅「冰」作自食嘅用途，量刑嘅起點一般定為12個月嘅即時監禁。

至於保管同埋控制偽製流通紙幣呢一個控罪，上訴庭冇訂下特別嘅量刑指引。喺呢一件案件而言，涉及嘅紙幣只係十張嘅500鈫紙同埋七張嘅100鈫紙，涉及嘅數量唔算係多，另外偽鈔嘅質素同埋仿真度亦都唔高，被告人只不過係用普通嘅打印機偽造呢一啲鈔票，屬於係小規模嘅製作。不過話雖如此，但係本席好相信欺騙嘅對象無疑會係一啲一般嘅小巿民、細小嘅商戶或者小販等等，對於呢啲中下階層而言，偽鈔嘅面額雖然少，但係對佢哋嚟講可能損失巨大，可能係佢哋一日賺下來嘅錢亦都只不過係數百鈫。喺考慮過過往嘅量刑嘅案例之後，本席相信合適嘅量刑起點應該係兩年半嘅即時監禁，即係30個月嘅即時監禁。被告人承認所有嘅控罪，佢可以係獲得三分之一嘅量刑折扣。

因此就住首項控罪，佢係被判處六年四個月嘅即時監禁。至於次項嘅控罪，佢係被判處8個月嘅即時監禁，首、次兩項控罪嘅刑期係同期執行。至於第三項嘅控罪，佢係會被判處一年八個月嘅即時監禁，呢項控罪嘅控罪性質，同首項同埋次項兩項控罪嘅罪行性質係完全不同，因此係應該以分期執行嘅形式處理。本席亦都考慮過整體嘅刑期，總體而言，就住被告人所承認嘅三項控罪，佢係被判處8年嘅即時監禁，呢個總體嘅刑期亦都反映係呢一件事件裡面整體嘅嚴重性，我認為判處嘅刑罰亦都係並不為過。

因此，就被告人所承認嘅三項控罪，佢係被判處8年嘅即時監禁。