香港特別行政區 訴 謝永傑

HCCC 286/2017

香港特別行政區

高等法院

原訟法庭

刑事案件2017年第286號

----------------

----------------

------------------------------------------

判刑
以下內容乃法庭數碼錄音謄本

------------------------------------------

官：　

被告人喺裁判法院承認一項販運危險藥物控罪，佢被轉介嚟高等法院作出判刑。

案情撮要顯示，被告人喺2017年4月12日，從一個處所離開嘅時候被警員截停，被告人作出反抗。及後，警員係進入呢一個處所搜查，喺睡房嘅床上高，警員係搜到153克嘅可卡因、一個電子磅同埋一啲係白色嘅粉末。咁涉案嘅可卡因市面嘅零售價約為係213,000港元。被告人承認販運處所裡面所搜得嘅可卡因。

佢被告人今年係32歲，有四次嘅刑事紀錄，其中一次係同毒品有關。法庭喺過往已經係給予被告人多次更生嘅機會，仲罰錢、感化令、社會服務令、教導所各樣嘅判刑都已經係作出過，咁但係被告人似乎對呢啲過往給予嘅機會係完全忽視，而呢一啲咁樣樣嘅判刑亦都係對被告人完全產生唔到任何嘅阻嚇作用。

喺今次事件裡面，求情嘅時候，咁你律師就替你係呈上一啲求情信、你父母嘅求情信，咁我明白父母替子女求情嘅原因，我亦都係完全理解到佢哋係希望法庭能夠對你係作出寬大嘅處理。不過你所干犯嘅係一項非常之嚴重嘅控罪，而且上訴庭亦都已經係定下清晰嘅量刑指引，喺冇任何其他特別嘅情況之下，下級嘅法庭係唔能夠隨意係更改嘅。再者，你已經係32歲，係一個成年人，你清楚明白知道自己所做嘅事。

就住販運153克嘅可卡因，根據上訴庭嘅量刑指引，量刑嘅起點係十年半嘅即時監禁，即係126個月。本案除咗被告人承認控罪之外，冇其他嘅求情理由。就住你所承認嘅一項販運危險藥物嘅控罪，你係可以獲得三分之一嘅量刑折扣，因此，你係被判處84個月（即係7年）嘅即時監禁。