香港特別行政區 訴 譚海傑

HCCC 57/2017

[2018] HKCFI 1239

香港特別行政區

高等法院

原訟法庭

刑事案件2017年第57號

----------------

----------------

-------------------------------------

判刑

以下內容乃法庭數碼錄音謄本

-------------------------------------

官：　

被告譚海傑被控一項販運危險藥物罪，違反香港法例第134章《危險藥物條例》嘅第4（1）（a）同埋（3）條，被告喺本席席前承認控罪，同埋承認咗案情事實之後，係被本席裁定罪名成立。

睇番案情，案情顯示案發嗰日係喺2016年嘅7月26號，當時被告人就畀警員見到就喺登打士街，向住一輛停泊咗嘅電單車度行去，當時同埋另外一個男子一齊嘅。咁被告人就打開咗喺嗰個電單車尾部一個鐵箱，就攞出咗兩個頭盔，被告就自己戴咗個頭盔，將另外個頭盔就交咗畀同行嗰個男子。咁當被告人係㧬住個電單車預備離開嘅時候，警員就截停咗被告人同埋另外嗰個男人。

咁跟住警員就去搜查呢個被告人呢架電單車上面嗰個鐵箱喇，就搵到有以下嘅嘢嘅：咁有一個紅色嘅利是封，入面就有四包係晶狀嘅固體，咁而係有呢個毒品「冰」嘅，咁後屘就知道分別係有10.4克、2.3克、2.4同埋2.3克嘅。咁另外一個就係一個黑色嘅盒，入面就有膠袋，咁後屘入面發覺就有0.6克嘅「冰」毒，咁又有飲管呀，同埋有一啲紙係包住一個「冰」壺嘅，即係愛嚟吸「冰」嘅壺喇。第三樣嘢就係一個黑色嘅眼鏡盒，入面又有呢個飲管喇，又有呢個電子磅喇，又有呢個毒品嘅。咁後屘發現咗嗰兩包分別就係7.1克喇，同埋2.9克嘅。咁另外仲有一個膠袋係袋住，後屘證實咗係呢個草本嘅大麻係17.8克，咁當然仲有一啲就係嗰啲可再封口膠袋喇。咁嗰啲「冰」毒夾埋晒就係總共係有24.04克嘅，即係嗰個個晶狀固體就24.72。咁而被告人身上又畀警員發現係有$2,048.9嘅。

咁而喺拉咗被告你喇，當時就話你呢個販運危險藥物，咁警誡咗你之後，被告人你當時就話嗰啲「冰」毒同埋嗰啲大麻都係畀你自己食嘅，就同你同行嗰個人係冇關嘅咁樣。咁跟住帶咗被告你返去旺角差館，咁喺警署就有一個錄影會面喇，咁喺錄影會面嘅時候，被告人你就講話喺呢個即係尖沙咀重慶大廈度，就向人買咗呢啲毒品，就一日要食成1克嘅「冰」毒嘅，咁而吸食大麻一日就吸食一兩次--即係嗰個內容其中部分喇，我唔講晒全部喇。

咁而係講番呢啲毒品嘅市值，「冰」毒就係$8,874，約數嚟嘅啫即係，而嗰個大麻就係$4,254。

咁而控方嗰方面，就搵咗一個係呢個精神科嘅專家，咁就畀咗啲意見，話如果一個人一日食成1克嘅「冰」毒，係可以致命嘅，即係嗰個份量係好重嘅，咁一般都係食60個毫克嘅啫。咁呢個就係即係專家嘅講法喇。

咁雖然被告人你喺拉咗嘅時候，同埋喺呢個警誡錄影嘅時候，都係話嗰啲毒品係畀自己食喇，咁但係被告，你喺本席面前承認嗰啲嘅「冰」毒同埋嗰啲嘅大麻，當時你係販運呢兩樣嘅毒品嘅。咁而就即係當時呢啲毒品，當然就係喺嗰個電單車度搵到喇，你係嗰架電單車嘅註咗冊嘅車主嘅。咁呢個就係案情喇。

好喇，被告你嘅背景同埋求情嘅陳詞。

咁被告喺1976年嘅6月出世，咁所以而家就差唔多42歲喇。就個刑事紀錄都幾差，喺法庭度出現過有十五次，就有十六次嘅刑事紀錄，以前就有管有危險藥物嘅紀錄嘅，1995年、97年、2013年都有，咁而就不過你就係未試過販運危險藥物嘅，今次係第一次。

咁就馬大律師喺代表你求情嘅時候就話畀我聽，就話你就其實已經有一個同居咗成十幾年嘅女士㗎喇，就最近結咗婚，咁所以就唔再係單身喇。咁同呢一個嘅即係太太喇，因為結咗婚喇嘛，就已經有一個15歲嘅仔。咁而被告你最後一次犯事就係管有危險藥物，就送咗去戒毒所嘅，其實係第三次㗎喇，嗰次。咁就馬大律師同你求情嘅時候就話，咁你喺個戒毒所出咗嚟之後就想即係重新做人喇，咁你走去考咗牌，就去呢個地盤度做嘢嘅。咁都做得幾好嘅，賺成二千幾鈫一日，就通常--即係最初做嗰陣時喇，一個月都做到成十八至二十日嘅，咁就幾好嘅。但係唔好彩，就係你個老闆，即係其實係一個判頭喇，咁就走你數，就唔出人工，咁整整下變咗因為你冇人工出喇，你就唔返工喇。咁喺你唔返工呢段時間，即係游手好閒，咁就變咗又試係食番毒品，咁所以就干犯咗而家呢個嘅控罪嘅。咁我唔再另外講你其他話--譬如話爸爸就即係好早已經離開咗你呀，喺單親家庭，咁嗰啲我唔提喇。

咁而馬大律師亦都特別強調，就係話你即係而家就好後悔干犯咗呢個控罪喇，咁亦都好想係即係重新做人喇，畀自己15歲嘅仔一個好嘅榜樣，咁所以就即係決心咗唔會再犯事，亦都係做個好榜樣，就係雖然自己冇人工出，即係因為嗰個老闆走咗數吖嘛，但係都願意係捐錢畀啲慈善機關，咁就畀咗一啲資料顯示你係透過7-11喇，係畀咗三個唔同嘅慈善機關，夾埋係3,000鈫嘅。

咁而馬大律師亦都係告知本席，就係話根據被告人你畀佢嘅指示喇，即係警方喺你個電單車鐵箱度搵到啲毒品，有四分之一嘅「冰」毒係打算愛嚟自己食嘅。咁而嗰啲大麻其實係打算愛嚟自己食嘅，不過都諗住會分啲畀人食，咁所以都承認係販運呢個嘅大麻。咁所以馬大律師要求本席就考慮到即係被告人你某部分嘅毒品係畀你自己食喇，咁喺判刑嘅時候畀被告人你一個扣減。

咁雖然馬大律師都接納被告人你唔係喺第一時間認罪喇，即係唔係喺呢個裁判署已經認罪喇。咁馬大律師就提醒本席喇，就最初被告人你之所以嚟唔到法庭度參加呢個即係初步嘅偵訊嘅時候，就因為就係不幸有一個交通嘅意外，咁就入咗醫院。咁而後屘其實知道被告人你就係呢個左邊嘅腳係有呢個骨折，而需要做手術係擺一啲嘅鐵片呀咁樣去幫助嘅，雖然畀唔到呢個醫生嘅報告畀我睇。咁佢話當時就係發生咗咁嘅事，咁做完術之後，被告人而家你亦都已經係可以行㗎喇。咁而被告人你一出咗院係能夠係去到見律師，畀咗呢個恰當嘅指示之後，就已經即刻係顯示話你會認罪，咁所以亦都希望本席喺考慮畀你適當扣減嘅時候，考慮埋呢一樣嘢落去。

咁好喇，到判刑喇。

咁販運危險藥物係非常之嚴重嘅罪行，咁你都知㗎喇。咁而今次因為涉及係兩樣嘅毒品嘅，一個就係「冰」，一個就係大麻喇，係草本大麻喇。咁喺法庭判刑嗰方面，就係兩個唔同嘅做法。一係就係一個即係個別去考慮唔同嘅毒品佢哋嗰個嘅量刑起點係幾多，咁然後加埋一齊。另外一個就係一個混合嘅做法，就係用一個比較嚴重嘅，譬如呢件案件嚟睇就係「冰」毒喇，用個「冰」毒嚟做個底嚟睇，然後再考慮埋啲大麻係加上去，咁有兩個唔同嘅睇法。咁亦都有案例話如果啲毒品係好唔同嘅，份量又唔同，性質又唔同，係應該用分開，獨立睇呢一個方法嚟做嘅，嗰件案就有一個案例，就係叫做高家興（譯音）嘅，譯音嚟嘅。咁當然本席係都記住，不論係用一個混合式嚟睇，或者係獨立式嚟睇，最主要都係話整體嘅刑期係要恰當嘅，呢個先係最重要嘅。

咁好喇，考慮咗，咁因為有案例話如果個毒品係好唔同，性質又唔同，份量又唔同，就應該分開睇，咁我就而家分開睇喇。咁睇「冰」先喇，「冰」就24.04克，咁根據一個叫做譚伊真嘅案例喇，如果你販運10至70克，經審訊之後嘅量刑起點係7至11年嘅。咁我考慮咗呢件案當時點樣搵到你呀，點樣係搵到嗰啲毒品，個份量，我就認為8年係一個恰當嘅量刑起點。

咁好喇，呢個草本大麻喇。草本大麻喺呢件案件入面涉及就係17.8克，咁喺好耐以前一件案件喇，1987年㗎喇，叫做陳志文（譯音）嘅案件，就話如果販運係少過500克嘅，就任由法庭去決定用幾多喇。咁但係嗰陣時喺嗰個案例就冇分開話草本大麻幾多呀，或者係大麻精又幾多呀，大麻油又幾多，冇分嘅。咁後屘喺另外一件案件就係叫做端瑞明（譯音）嘅案件。咁嗰件案件呢個上訴法庭就畀咗呢個量刑指引，就係販運呢個叫做--應該叫做大麻精（resin）嚟嘅。咁佢就係話如果係喺2,000個克以下，就嗰個量刑起點可以係由即係一兩個月一路去到16個月嘅。咁但係當然喇，就要記住草本大麻就唔同呢個大麻精嘅，即係當草本大麻係冇咁強嘅，嗰個藥性。咁而根據案例，就大概喇，好大概嚟睇，大麻精就應該係草本大麻嘅四倍，咁如果咁樣嚟計番，即係如果草本大麻係少過2,000克，咁就即係嗰個判刑應該係去到4個月囉，咁呢個就係另外一件案件係香港特別行政區訴左雷嘅案件，當時聽上訴嘅原訟庭法官係咁睇嘅。

咁當然喇，喺呢件案件，而家講緊17.8克，即係有排都未到2,000喇，即係相比2,000真係細好多好多。咁我亦都接納，就被告人你當時其實嗰啲草本大麻係預備自己食嘅，咁你係--即係點解係會販運呢？就係因為你諗住同人分吖嘛，喺咁嘅基礎嘅。所以咁嘅情況之下，我就認為個量刑起點1個月就啱喇。

咁好喇，咁雖然我頭先講咗話要分開嚟睇喇，咁一個8年，一個1個月喇，咁但係我又考慮咗如果喺考慮成個案情，嗰個草本大麻的確係好細，咁所以我就直情就咁用8年作為量刑起點喇，我唔計嗰一個月落去喇，咁呢個就係量刑起點。

咁好喇，咁就要計被告人你自己食用嗰方面喇喎，因為有案例講，如果有部分嘅毒品係被告人你食，即係有一個相當大嘅部分喇，唔係話少得好緊要喇。咁就法庭係需要考慮畀一個扣減嘅。咁我睇到咁你有「冰」壺喺度喇，又有呢個飲管喇，即係好明顯係吸食㗎喇，同埋你嗰個案底都睇到入戒毒所三次喇，有呢個管有危險藥物。咁所以我接納你嘅講法，就係嗰啲搵到嘅「冰」毒，有四分之一係畀你自己食嘅。咁所以喺咁嘅情況之下，我就係做一個嘅扣減喇，就根據嗰個--即係呢啲案例喇，睇番個案例喇，我就係會畀你呢個叫做十分之一，即係10 per cent嘅扣減。如果以8年嚟計就96個月喇，其實稍為多過10 per cent嘅，因為如果係減9.6個月就好麻煩喇，即係10個per cent，所以我就減夠10個月。咁變咗個量刑起點就係86個月，即係96個月我減10個月，咁就變咗係86個月。

咁好喇，86個月就開始就要計，再減刑就係咩嘢呢？認罪喇喎，點減呢？咁因為呢件案件係喺呢個初級偵訊拎上嚟高等法院係聽呢件案件嘅時候，係2017年嘅2月20號嘅，咁嗰陣時就上訴庭就呢個吳文南嘅案件已經係畀咗㗎喇，所以吳文南畀嗰個新嘅指引係有效嘅，個新嘅指引就係話，如果唔係喺最初已經認咗罪喇，就喺上咗嚟高等法院，已經定咗一個聆訊日期，不過又未到聆訊日期之前就認罪喇，咁喺呢段時間就可以有20個per cent至到25 per cent嘅扣減，即係五分一至四分一嘅扣減，20個per cent至25個per cent。咁我就要喺呢度考慮我畀你20吖，定畀你25個per cent喇喎。咁我就考慮到就事實上，你係有一個交通意外，咁令到你受咗傷，入咗醫院，要做手術喇。咁喺咁嘅情況之下，變咗你唔可以及早係將你嗰個案情去畀指示畀代表你嘅馬大律師，馬大律師亦都冇機會係畀一個恰當嘅呢個佢嘅意見，即係佢嘅專業意見畀你喇。咁後屘因為即係出咗院之後先至有時間做到喇，所以我都接納喺咁嘅情況之下，你都係及時話到畀本席聽你會認罪，所以我畀番你係四分一，即係25個per cent嘅扣減。咁如果用86個月嚟計，25個per cent嘅扣減，就變咗係64.5喇，即係我計出嚟，大家可以一齊計下。咁就即係五年四個半月喇，如果以64.5嚟計，冇計錯，係咪？用86嘅四分三，係咪應該就係64.5呀，啱唔啱？即係86除4乘3，大家一齊計下，因為我計數唔係最精嘅，我都驚計錯。啱呀？如果64.5，咪即係五年四個半月囉，係喇，啱喇，係咪？Okay。

咁好喇，咁馬大律師喺求情嘅時候都特別強調，就因為被告人好想做一個好榜樣畀自己15歲嘅仔，亦都好想係重新做人，唔再犯事喇，咁所以雖然係即係喺拉咗呢件案之後喇，因為嗰陣時係保釋期間吖嘛，咁雖然就嗰個老闆又唔畀錢，其實就嗰個經濟上都唔係咁好㗎喇，都去捐錢畀一啲慈善嘅機關。咁喺咁嘅情況之下，我就願意係畀被告人你再多一個扣減，就係嗰半個月嘅扣減，即係唔使坐多半個月，咁即係夾埋晒我就要被告人你就而家呢個嘅販運危險藥物罪係坐五年四個月監，明白喇嘛？如果我冇計錯呢個就啱㗎喇，即係如果我頭先冇計錯嘢。