香港特別行政區 訴 陳子健

HCCC 319/2017

[2018] HKCFI 1758

香港特別行政區

高等法院

原訟法庭

刑事案件2017年第319號

----------------

----------------

-----------------------------------------

判刑
以下內容乃法庭數碼錄音謄本

-----------------------------------------

官：　

本案嘅被告人原本被控七項強姦罪，但係控方接納佢承認七項與年齡喺13歲以下嘅女童非法性交嘅交替罪名。

案情指，女童X喺事發嘅時候係12歲，離家出走後，經朋友介紹之下，認識咗當時21歲嘅被告，並且喺被告嘅屋企留宿，期間被告七度同X發生性行為，每次均冇使用安全套。後來女童被家人尋獲。被告喺女童與家人前往警署銷案之後，因為擔心要負上刑責，所以離開香港，並且喺澳門逗留咗大約五年零九個月，喺返番香港嘅時候，入境大堂嘅時候被拘捕。

被告現年已經28歲，佢有八次涉及盜竊同埋暴力控罪嘅定罪紀錄，喺2010年3月，因為毆打引致他人身體造成實際傷害罪，被判到戒毒所服刑，佢應該係喺獲釋不足一年之後就干犯本案。

大律師喺求情嘅時候指，喺第一次案發嘅日期嘅時候，女童X仲有五個月就滿13歲，而當時被告係真誠視女童為佢嘅女朋友，先至同佢發生親密關係。而當X喺佢屋企留宿嘅期間，佢亦都有照顧X嘅起居飲食。大律師又指，被告當時因為性知識貧乏，誤信坊間嘅錯誤性資料，先會冇使用避孕套。大律師又話，被告喺潛逃期間已經漸趨成熟，成為一個負責任同埋有穩定工作嘅人，亦都開始咗佢另一段感情，今次佢毅然返香港係希望可以承擔法律責任。

本席喺量刑嘅時候考慮咗本案嘅案情、有關嘅案例、大律師嘅求情，亦都閱讀咗被告父母所撰寫嘅求情信。根據鍾銳洪一案，呢一類嘅罪行嘅立法原意係保障年幼無知嘅女童，以免佢哋被人利用同埋傷害，咁即使過往係冇同類案底嘅被告，亦難倖免於長時間嘅監禁嘅刑期。

根據受害人（即係X）嘅心理創傷報告顯示，佢現在已經19歲，並且已經完成中六嘅課程，投入社會工作，有穩定男友。不過當被問及本案嘅情況嘅時候，佢仍然係難忍眼淚，表示當年因為家庭不和睦，誤解自由先至離家出走，以致法庭需要頒下保護令，同埋命令佢需要喺院舍居住，而佢係通過院友嘅介紹認識本案被告嘅。佢係喺被告嘅住所居住咗大概一個月，期間同被告進行咗多次嘅性行為。雖然佢曾經向心理專家表示有幾次係佢唔自願嘅，但係由於被告承認嘅控罪同埋獲得控方接納嘅係與年齡在13歲以下嘅女童非法性交控罪，而並非強姦控罪，本席喺判刑嘅時候，必須以前者為基礎，不會考慮受害人聲稱不自願，甚至係受威逼等等呢啲指控。但係不容忽視嘅係事件對受害人嘅心理嘅影響係長遠嘅。

心理專家報告指出，X自兩、三年前開始出現情緒抑鬱嘅徵象，以及萌輕生嘅意圖，事件不愉快嘅景象不時喺佢嘅腦海浮現。專家認為佢對他人不信任，亦都自責，呢啲對佢將來嘅人際關係同埋一般嘅發展不無影響。

而被告嘅背景、精神料同埋心理報告顯示，被告自細性格反叛，9歲嘅時候已經第一次離家出走，多次干犯店鋪盜竊，入過男童院，去過教導所，後來更加濫用精神科藥物同埋毒品，導致佢需要去戒毒所服刑，但係之後佢仍然係冥頑不靈，父母對佢可以講係束手無策。佢亦都大言不慚地向精神科醫生同埋心理專家承認，本案佢喺扣押期間曾經兩度𠝹腕，目的係為咗偽裝患上情緒或者精神病，好讓佢被轉介留喺小欖精神病院，以逃避收押所中在囚人士對佢嘅欺凌。兩位專家均認為被告為人並不可靠，屢次以欺詐嘅手段，以達一己嘅目的，做事罔顧他人同埋後果，具反社會人格，守法意識極之薄弱。精神科醫生並不認為被告人有精神病，而心理專家就認為雖然被告未致屬有戀童嘅傾向，然而佢係因為自我形象低落，而選擇比佢年紀細好多，甚至未成年嘅人士交往呢一點係值得關注嘅，而要糾正咁樣樣嘅心理障礙嘅輔導需時頗長。專家認為被告重犯呢一類案件嘅機會屬中高度。

本席喺量刑嘅時候，考慮咗本案嘅案情、大律師求情同埋被告認罪等等，然而，本案係有住以下令案情情節嚴重嘅因素：第一，喺每次性行為嘅過程中，並冇使用安全套；第二，雖然被告對感化官同埋精神科醫生均表示，當佢同X進行性行為嘅時候，佢並不知道X嘅實際年齡，以及以為X已經有十四、十五歲，呢一點明顯與被告已經承認嘅案情係背道而馳，案情第10段清楚顯示，X嘅一名朋友喺3月，即係兩個人開始第一次進行性行為之前，已經講過畀被告知X嘅年齡，而被告亦都曾經喺X面前翻看載有佢年齡嘅手冊，再加上被告喺X被家人尋獲報警之後隨即畏罪潛逃，呢啲種種均顯示被告對於被告同X進行性行為嘅時候，對佢嘅實際年齡係瞭如指掌，明知不可為而為嘅。佢對於心理專家或者精神科醫生所聲稱話唔知道X嘅年齡全屬嘗試淡化佢嘅刑責嘅作為；第三，被告當時嘅年齡係21歲，雖然唔屬於年長人士，但係同女童係有一定嘅距離，雖然可能根據佢哋所講，可能係男女朋友、兩情相悅，但係唔可以算係兩小無猜嘅情況；四，涉及總共係七次非法性行為，而涵蓋大概係一至兩個月嘅時間，本席亦都考慮咗事發嘅時候，女童仲有五個月就13歲，而根據法例，如果同13歲以上、16歲以下嘅女童發生性行為嘅最高判刑係5年監禁，而喺本案呢七組嘅控罪，即係與年齡係喺13歲以下嘅女童非法性交嘅最高刑期係終身監禁。

本席認為本案每項控罪嘅量刑基準應該係4年，由於被告喺案件轉介到高等法院，並且已經排期審訊之後，喺案件管理嘅聆訊嘅時候先至表示會認罪，而實際上佢喺聆訊首日先至承認控罪嘅，佢並不能獲得及早認罪嘅三分之一嘅認罪扣減，本席只係予以10個月嘅量刑扣減，每項控罪判刑38個月，同期執行。