香港特別行政區 訴 朱歷輝

HCCC 21/2018

[2018] HKCFI 2349

香港特別行政區

高等法院

原訟法庭

刑事案件2018年第21號

----------------

----------------

---------------------------------------

判刑
以下內容乃法庭數碼錄音謄本

---------------------------------------

官：　

本案被告喺聆訊之後被裁定一項搶劫罪，罪名成立。

受害人係一個一個星期去兩日渡假屋清潔嘅女工，事發當日，佢去到清潔嘅時候畀被告人從後襲擊，被告人更加出示一支類似電槍嘅物體電咗佢個面幾下，跟住逃脫，亦都攞走咗受害人嘅背囊，背囊入面有一個銀包，有現金650鈫、一張香港身分證、一張銀行卡同埋一沓卡片。受害人除咗右邊面有擦傷之外，其他並無大礙。

被告現年44歲，喺中國出生，由2001年開始多次非法嚟香港，並且喺香港干犯刑事控罪，佢個定罪紀錄一共有十七次，當中包括咗有盜竊罪、有入屋犯法罪，亦都有企圖行劫罪。事實上，佢2001年因為企圖行劫，亦都被判過10個月嘅監禁。此外2007年，呢個企圖入屋爆竊28個月嘅監禁。佢最後係喺2016年6月13號，就住非法來港以及店鋪盜竊兩條控罪，合共被判20個月再加兩個星期嘅監禁。明顯地，被告並非香港嘅居民，而本案係佢喺非法入境香港之後干犯嘅。

大律師並冇就被告嘅背景作任何嘅求情，只係呈交咗三個案例，分別係茆廣生、范兆祺同埋顏寶玉（譯音）。

本席喺量刑嘅時候，考慮咗本案嘅案情、有關嘅量刑指引。而根據顏寶玉一案，即使有關嘅武器係電槍，佢不屬於火器或仿製火器，所以應該沿用茆廣生案，涉及使用危險武器行劫案件嘅量刑指引，咁即係話一般嚟講起刑點係5年。但係本案涉及：首先入侵私人嘅地方、對受害人使用武力，以及其他令案情情節嚴重嘅因素，包括被告人並非香港居民，多次嚟香港係犯案，佢屬於多次從內地來港犯案，屢犯屢究嘅積犯。

綜合以上所有嘅因素，本席以8年作為本案嘅量刑基準，被告喺審訊後被定罪，不予以任何嘅量刑扣減，而呢個刑期亦都與佢而家坐緊嘅監禁分期執行。