香港特別行政區 訴 林宗斌及另二人
Read the full judgment text of HCCC 219/2016 on BabelCite. This High Court CFI judgment was delivered on 7 September 2018.
|
HCCC 219/2016 [2018] HKCFI 2348 香港特別行政區 高等法院 原訟法庭 刑事案件2016年第219號 ----------------
----------------
------------------------------------- 判刑 ------------------------------------- 官： 三名被告喺原來嘅控罪書上共同被控一項串謀販運危險藥物罪。第三被告承認控罪，第一同埋第二被告否認控罪。第一、第二被告就經修訂嘅控罪書接受審訊，之後被裁定罪名成立。 案情指佢哋三個人同一個叫做彭秀蘭嘅女士串謀將毒品從深圳帶到香港，方法係將毒品藏喺第三被告嘅輪椅咕𠱸內，由第三被告帶過關，然後將毒品放喺酒店嘅房間。當彭小姐將毒品放到第三被告個咕𠱸嘅時候，第一、第二被告亦都在場，然後佢哋分頭從深圳返香港，而第三被告今次帶毒品嚟香港係可以獲得15,000鈫嘅金錢報酬，第一同埋第二被告則係喺酒店負責處理以及分發毒品。 有關嘅「冰」毒被警員搜出嘅時候大概係3.37公斤，價值約一百三十多萬。 第一被告現年係28歲，喺2008年因為管有危險藥物被判去勞教中心。第二被告現年48歲，有兩項刑事紀錄，均為管有危險藥物，分別係喺2004同埋2006年，兩次都被判罰款。第三被告之前係冇刑事紀錄，而第三被告現年係46歲。 三位被告嘅大律師均同意本案涉及嘅毒品屬於大量，亦都牽涉跨境因素，但係都希望本席能夠予以一個較低嘅起刑點，予以輕判。另外，第三被告嘅大律師要求本席考慮第三被告個人嘅健康問題，佢患有大腦麻痺，行動不便，22歲開始坐輪椅至今。另外，第三被告係兩度出庭作供，指證同案被告，令控方成功檢控，所以第三被告嘅大律師希望本席能夠寬大處理。 喺販運危險藥物控罪嘅判刑上，被告人嘅個人因素所佔嘅考慮係好細，主要嘅考慮係毒品嘅重量。本案涉及嘅毒品係3,379克嘅「冰」毒，零售價大約係一百三十萬。而根據譚伊真同埋Abdallah案所頒下嘅量刑指引，販運1,200至到4,000克嘅「冰」毒，量刑基準係23至26年。就本案所涉及嘅「冰」毒，本席以25年作為量刑基準。基於本案涉及跨境犯案嘅因素，將起刑點往上調兩年至27年。第一同埋第二被告喺審訊後被定罪，不予以任何扣減。而第三被告不僅喺好早嘅時候已經承認控罪，更加兩度出庭作供，指證同案被告，本席認為佢嘅證供屬真實同關鍵指證共犯嘅證據，本席予以大概55個per cent嘅量刑扣減，判刑12年。 |