盧偉強 訴 徐潮宏

DCCJ000772/2003

DCCJ772/2003

香港特別行政區

區域法院

民事訴訟2003年第772宗

主審法官：黃慶春法官法庭聆訊

日期：2003年12月05日

時間：下午4時33分

________________

判案書

________________

1.在這件案中，原告人向被告人申索，佢嘅貸款中有249,810元還未歸還。呢筆貸款係喺1995年，原告人資助被告人與一位親戚買賣股票、期貨同埋外匯之用。喺1996年，被告人經過計數之後，發覺損失了160,000元，呢筆款項原來都係由原告人所支付嘅。直至1996年8月，原告人發覺被告人欠了幾張信用卡一共債務有14萬元之多，因此，佢代被告人歸還信用卡債務14萬元。還款方法是經過原告人一個職員林先生，佢將現金交畀林先生，林先生以一個親屬嘅戶口轉戶畀被告人，轉戶日期係1996年8月7日。

2.被告人喺97年5月和11月再向原告人借兩項貸款。第一項係37,810元，據說係一個炒期指所欠嘅款項。第二項係佢因為結婚、買樓需要支付嘅數目，係35,000元。喺96年9月，被告人開始每月還2,000元予原告人，一直至98年1月，一共還款47,000元。喺往後嘅日子，佢有一年多冇再還款。

3.直至到99年5月5日，原告人與被告人達成一個協議，大家確認被告人所欠嘅付款，於是由原告人草議，被告人用電腦打出呢一份原告證物P1嘅借據。喺裡面，被告人同意佢一共欠款372,810元。而被告人亦都同意，喺96年9月3日至98年1月已經還款47,000元。凈番嘅325,810元，被告人同意佢以每月還款2,000元嘅方法歸還原告人，呢個係得到被告人簽紙確認，原告人亦有簽紙確認。

4.以後，被告人以現金方式，每月歸還2,000元嘅現金畀原告人，並且原告人係喺被告人嘅紀錄中簽名確認每個月嘅還款。喺呢段時間，即99年5月至2001年12月，被告人一共還款64,000元，以現金方式每月2,000元嚟計。

5.喺2002年2月28日，因為原告人嘅生意受挫折，所以佢要解僱被告人及其他嘅員工。喺呢段時間，2000年1、2月和8月至11月，被告人將每月每次2,000元存入原告人妻子嘅銀行戶口，呢度被告人再還12,000元。這些還款，得原告人所承認。

6.最後，經過調整佢嘅追索，原告人向被告人追討249,810元。在庭上，被告人亦公開承認佢仍然欠了原告人249,810元，呢啲錢佢係未歸還。既然被告人公開承認佢欠了原告人249,810元，而這正是原告人所追索的銀碼。我因此判原告得直，被告人需要歸還原告人一份欠款249,810元。

7.既然原告人係得直嘅，這訴訟的費用和今日的費用應由原告所得，為被告人所支付。如果雙方未能達成一個訟費協議，原告大可以向法庭常務官要求審核。被告人需要由今日開始向原告人支付利息直至款項付清為止。（法庭嘅利率年息8厘起計）

出席人士：

原告人出席，並無律師代表

被告人出席，並無律師代表