香港特別行政區 訴 林鉅軒 Bobs
|
HCCC242/2008 香港特別行政區 高等法院 原訟法庭 刑事案件2008年第242號 ----------------------
---------------------- 主審法官： 潘敏琦暫委法官 日期： 2009年2月6日上午10時17分
控罪： 販運危險藥物等罪項（Trafficking in a dangerous drug, etc.） 判刑 官：被告承認一項販運危險藥物罪，違反香港法例第134章《危險藥物條例》第4（1）（a）及（3）條及一項管有危險藥物罪，違反香港法例第134章《危險藥物條例》第8（1）（a）及（2）條。 案情指，被告從羅湖入境嘅時候被關員截查，關員發現佢褲袋內有一袋毒品，被告承認係替人運送「K仔」到旺角，以抵銷10,000鈫嘅債項。毒品經過化驗之後，證實為255.24克粉末，內含218.85克氯胺酮。另關員及後搜查被告住所，發現住所內有內含14.46克氯胺酮嘅16.88克粉末，被告承認該些毒品係供佢個人服用嘅，毒品總數量當時嘅零售價為港幣32,382元。 被告現年23歲，未婚，過往並冇刑事紀錄。大律師求情嘅時候表示，案發之前，被告與家人同住。佢喺中三畢業之後，做過不同類型嘅工作。喺07年結識損友，喺損友介紹下，開始吸服氯胺酮，並開始喺深圳毒販處購買毒品，以作吸食用途。後來因為工作不穩定，欠下毒販債項，今次先會鋌而走險，干犯本案，希望藉此能夠填數。被告喺佢嘅求情信中，亦都表示對今次犯事深感內疚，希望早日獲釋，照顧家人，克盡孝道。 本席喺量刑嘅時候，考慮咗本案嘅案情、毒品種類、重量、新嘅量刑指引、被告認罪、大律師嘅求情，亦都閱讀咗被告以及佢嘅母親所撰寫嘅求情信。本案發生喺許守城案新量刑指引頒發日期之後，根據新嘅指引，販運50至到300克氯胺酮嘅起刑點由6年至9年。就本案嘅218.85克氯胺酮，本席採用八年半嘅起刑點，予以三分之一嘅量刑扣減，判刑68個月。另外，就第二項管有危險藥物罪，以9個月作為起刑點，判刑6個月。兩條控罪，刑期同期執行。 |