香港特別行政區 訴 蔡濟謙
|
HCCC174/2008 香港特別行政區 高等法院 原訟法庭 刑事案件2008年第174號 ----------------------
---------------------- 主審法官： 湯寶臣法官 日期： 2009年1月19日下午4時46分
控罪： 強姦（Rape） ----------------------------------------- 判刑 -------------------------------------------- 官：被告係被控一項強姦罪，佢否認控罪。喺審訊之後，被告係畀陪審員以五比二嘅大比數裁定佢罪名成立。 被告係現職嘅警員，佢已婚，仲有一名六歲幾嘅小朋友。本案嘅案情，喺審訊嘅時間已經係詳細咁樣透露咗，本席唔打算重複細節。 基本嘅情況係受害人喺網上認識咗被告係兩、三年，後嚟喺去年嘅2月27日，受害人上咗去被告屋企，畀部PSP遊戲機畀被告去整，但係事後被告就將佢係強姦咗。 受害人話佢係唔同意同被告性交嘅，佢亦都有向被告人係表達過，但係被告就唔理會，而將佢強姦。喺性交嘅時間，被告係冇用到安全嘅設施。當然，辯方大律師就話，被告屋企就根本冇安全套喺度，但係無論如何，咁樣嘅情況係會令受害人要面對染病同埋懷孕嘅可能。本席同意，辯方代表律師提出話被告人係冇用到過份嘅暴力，但係其實以佢身形同埋體重，佢亦都唔需要用太大嘅暴力去制服瘦弱嘅受害人。 本席同意，被告喺今次事件之中並非係一早有預謀，佢亦都冇用警察嘅身分去幫佢犯案。但係無可否認嘅一點，就係受害人必定係有考慮到被告係警察，而對佢有好大嘅信任，先至會大膽隻身上去被告嘅屋企，但係估唔到被告會知法犯法將佢強姦。雖然受害人以往已經有過性經驗，但係從法庭上可以見到事件對佢嘅打擊係好大嘅，而佢仲要喺公眾嘅地方再將呢個慘痛嘅經歷係描述，又要接受詳細嘅盤問，令到呢位年輕嘅女士係非常之尷尬。 喺判刑方面，本席同意辯方提出嘅劉展宇（譯音）及另一件案例就係陳修文（譯音）都對本案有參考嘅價值。喺考慮過本案嘅情況之後，本席決定會判監七年。本席理解，今次嘅事件會令到被告會失去好多，但係本席睇唔到有乜嘢其他有效嘅求情理由再去減刑。 本席已經多次喺法庭提醒過，年青人喺網上認識朋友係需要小心，更加唔應該隨便同對方係單獨喺私人地方見面，喺呢一方面希望家長同埋教育機構要多加關注。 上訴許可申請被駁回。請參閱CACC42/2009 日期: 2010年8月10日 |