香港特別行政區 訴 方文祥
|
HCCC65/2009 香港特別行政區 高等法院 原訟法庭 刑事案件2009年第65號 ----------------
----------------
-------------------------------------- 判刑 -------------------------------------- 官： 被告承認一項販運危險藥物罪，違反香港法例第134章《危險藥物條例》第4（1）（a）及（3）條。 案情指，警員搜查一個單位嘅時候，發現被告喺其中一個房間嘅床上，警員喺床褥下搜出一包白色嘅粉末。另外，從一個儲物位置內搜出三包白色粉末、一細包嘅粉末、一個電子磅同埋兩包透明膠袋。被告承認毒品係「K仔」，係佢從皇崗購入之後，準備交畀另外一個人，從中可以獲得港幣5,000元嘅報酬。 毒品經過化驗之後，證實為557.79克嘅粉末，內含459.05克嘅氯胺酮。毒品總數量當時嘅零售價為港幣66,377元。 被告現年22歲，過往有三次刑事紀錄，從來未被判入獄。 大律師喺求情嘅時候表示，被告已經坦白認罪，深切反省，喺佢嘅求情信中彰顯悔意。大律師又指，被告干犯本案嘅日期距離新嘅量刑指引頒下嘅日期尚短，希望本席考慮，予以輕判。而被告喺求情信內表示佢係因為一時貪念，干犯嚴重嘅罪行，愧對家人及朋友。佢亦都明白會面對頗長嘅牢獄生涯，佢會喺獄中積極進修，希望獲釋之後回饋社會。 本席喺量刑嘅時候，考慮咗本案嘅案情、毒品嘅種類、重量以及量刑指引、被告認罪以及大律師嘅求情，亦都閱讀咗被告所撰寫嘅求情信。本案係發生喺許守城案新量刑指引頒發日期之後，根據新嘅量刑指引，販運300至到600克嘅氯胺酮，起刑點由9年至12年。本案牽涉嘅係459.50克嘅氯胺酮，本席採納十年半嘅起刑點，予以三分之一嘅量刑扣減，判刑84個月。 |