香港特別行政區 訴 劉文政
|
HCCC106/2009 香港特別行政區 高等法院 原訟法庭 刑事案件2009年第109號 ----------------
----------------
-------------------------------------------- 判刑 -------------------------------------------- 官： 被告承認一項販運危險藥物罪，違反香港法例第134章《危險藥物條例》第4（1）（a）及（3）條。 案情指，被告被警員截查，喺佢嘅腰封內搜出四包毒品。毒品經過化驗之後，證實為106.94克晶狀固體，內含104.4克甲基苯丙胺鹽酸鹽，市值約71,435元。 被告承認毒品係「冰」，而佢係為咗金錢利益先至替人從大陸將啲「冰」帶到香港。 被告現年38歲，共有六次一共二十二項刑事紀錄，全部與毒品無關。佢最後一次嘅刑事紀錄係2009年4月1日，因為刑事毀壞罪而被判監4個月，而該案係喺2008年10月干犯，即係話本案係喺該案嘅擔保期間干犯。 大律師喺求情嘅時候表示，被告曾經做過塑膠廠學徒、侍應、裝修工人等工作，後來因為與女友分手，情緒低落先至接觸毒品，引致患上燥狂抑鬱症，以及由毒品引致嘅精神失常，接受過治療，但係喺1999年已經成功戒除毒癮。佢喺2003年於廟街從事相士一職，但係生意不佳，所賺嘅金錢不足以糊口維生，因為經濟壓力及受人誘使之下，再次吸食毒品，並欠下毒品數。今次係受咗友人嘅唆擺，並想藉此償還毒品數，而協助他人將毒品從深圳帶回香港。大律師又指，被告已經非常後悔佢嘅所作所為，故此喺被捕嘅時候與警方合作，第一時間認罪，彰顯悔意。 本席喺量刑嘅時候考慮咗本案嘅案情、毒品種類、重量、有關嘅量刑指引、被告認罪、大師嘅求情。本案嘅毒品係「冰」毒，根據量刑指引，販運70至到300克嘅「冰」毒起刑點係10至到14年。而根據案例，經濟因素販運毒品並非可獲扣減刑期嘅求情因素，本案牽涉係販運106.4克甲基苯丙胺鹽酸鹽，本席認為11年嘅起刑點係適合嘅，予以三分之一嘅認罪扣減，判刑88個月（7年4個月）。 |