香港特別行政區 訴 劉傑斌
|
HCCC134/2009 香港特別行政區 高等法院 原訟法庭 刑事案件2009年第134號 ----------------
----------------
-------------------------------------------- 判刑 -------------------------------------------- 官： 本案被告承認一項串謀販運危險藥物罪，違反香港法例第134章《危險藥物條例》第4（1）（a）、（3）與及（39）條，同埋第200章《刑事罪行條例》第159A條。 案情指，被告喺一大廈梯間被警員截查，警員喺佢嘅左手膠袋中發現一包毒品，被告承認因為經濟理由，替人運送「K仔」。毒品經過化驗之後，證實係726.47克粉末，內含258.29克氯胺酮。另外，警員及後搜查被告所租住嘅賓館房間，發現有微量氯胺酮與及毒品包裝工具，其中包括電子磅與及大量可再封口膠袋。 被告承認係為另外一個人工作咗約一星期，之前曾經兩度運送分別為3.5克同埋14克氯胺酮予兩名人士，並向佢哋收取金錢，據稱每日可以賺取700鈫嘅報酬。撿獲嘅毒品當時嘅零售價為港幣88,629元。 被告現年20歲，過往並冇刑事紀錄。 大律師喺求情嘅時候表示，被告完成會考之後，曾經從事製餅學徒與及速遞等工作，每月係給予3,000鈫家人幫補家計，後因父親失業，母親患病，家中有經濟嘅壓力，經不起損友唆擺，而為咗賺取快錢，而鋌而走險，干犯本案。 大律師指，被告喺干犯本案之後深感後悔，第一時間認罪，彰顯悔意，希望本席能夠予以一個較低嘅起刑點，大律師強調，從被告家人、師長嘅求情信件可見，被告本質不壞，只係因為經濟原因，而誤入歧途。而今次他人所原本付予佢嘅700鈫一天嘅報酬係尚未收獲。 本席喺量刑時候考慮咗本案嘅案情，毒品嘅種類、重量、有關嘅量刑指引、被告認罪、大律師嘅求情，亦都閱讀咗被告父母，與及佢之前就讀學校嘅舍監、小童群益會嘅外展社工等撰寫嘅求情信件。 本案係發生喺許守城案嘅新量刑指引頒發日期之後，根據新嘅量刑指引，販運50至到300克嘅氯胺酮，起刑點由6年至9年。就本案係涉及串謀販運毒品，所涉嘅除咗當時喺被告人身上所撿獲嘅218.85克嘅氯胺酮，亦都涉及佢之前已經運送嘅3.5克同埋14克嘅氯胺酮，總重量係236.35克。 所有牽涉販運危險藥物嘅控罪屬嚴重罪行，即使涉案被告年紀尚輕，或者過往並冇刑事紀錄亦然。就本案案情而言，本席採納八年半作為起刑點，予以三分之一嘅認罪扣減，判刑68個月（五年八個月）。 |