香港特別行政區 訴 麥兆康
|
DCCC225/2009 香港特別行政區 區域法院 刑事案件2009年第225號 ----------------
----------------
---------------- 判刑理由書 ---------------- 1.販運毒品係嚴重罪行，呢個係老生常談，量刑起點嘅範圍根據上訴嘅判例指引，係以份量做標準。本席接納啲毒品即係有部分係給予他人，就算係咁，都係超過50克㗎喇，咁個判刑指引係6年至9年，咁當然應該係接近6年，即係9年抑或係甚至少過6年，要睇有冇特別情況，如果要超越呢個範圍嘅，要少過6年，要有特別情況，法庭睇唔到你有咩嘢特別情況。當然，你嘅律師指出，話有部分係朋友搭買，表面上係一個特別情況，但係山長水遠去到深圳帶住毒品過境，亦都令到案情更加嚴重，任何國家都係，帶住毒品過關係一個嚴重嘅罪行，所以求情同呢個特別因素差唔多係抵銷咗。 2.仲有一樣嘢，法庭認為你冇清楚講出個朋友搭你買，個朋友係自己食抑或佢搭你買，佢又分畀人食，因為圖利，你亦都冇講清楚你自己有冇圖利。法庭所以假設係講漏咗，當你係冇圖利，但係喺你自己寫嘅求情信，你都係深深不忿，你認為覺得你朋友累咗你，但係你焉語不詳，朋友係男係女、姓乜名乜、住喺邊度都唔想講，似乎又同埋怨佢嘅感受有衝突，本席相信你亦都冇同警方講出呢位朋友，照你所講，佢嚟都冇嚟探你監，冇向你表示歉意，你對佢極為不滿，但係調番轉頭，你特別維護佢，直至今日，都唔願意透露佢嘅詳情，咁呢啲係你嘅權利，但係我只係指出有求情理由你自己唔利用。 3.咁法庭個判刑當你就唔係商業性質，唔係直情有金錢上嘅得益，係純粹幫朋友，照你所講，你係好似幫朋友，其實呢位朋友家長就話你害咗佢，都可能係咁，正如你自己怪責交上壞朋友，人哋認為我個仔又好，女又好，本來都唔敢出去買毒品嘅，而你就肯同佢去深圳帶返嚟，如果佢家長睇到，佢一定會將個責任推一部分喺你度。我諗你都唔睇到呢樣，你只係怪責朋友，逃避警方拘捕、偵察。嗌你去買賣，咁呢樣嘢你應該一早知嘅，唔會帶多啲毒品喺身，畀警察拉到嘅機會會少，你應該都知道。 4.法庭亦都考慮到你幫嗰個朋友，個朋友本身係吸毒，雖然你冇講清楚，但係你嘅言下之意，佢都有吸毒，咁所以比一般情節都係輕嘅，所以法庭可以用最低嘅量刑起點，以6年做基礎。咁因為你係認罪，所以上訴庭嘅判例好清楚，一定要畀三分一減免。咁仲有冇其他求情因素呢？我認為都有，因為你坦白向警方承認你係同朋友帶呢個毒品，咁就呢件案，節省咗警方一啲時間，如果喺法庭認罪，你可以得到三分一減免，無論證據幾強都好，你都可以得到三分一。咁我認為如果你向警方坦白承認，應該亦都--起碼都有個象徵式減免，因為假如有一個被告人不同警方合作，行使佢自己嘅權利，浪費警方好多長時間偵查，上到嚟法庭先至認罪，咁佢亦都係得三分一，如果同案被告一早認罪嘅，咁應唔應該得到額外減免？我認為應該得到。咁當然法庭唔可以作出再多啲嘅減免，因為法庭考慮到你已經有三分一嘅減免。 5.法庭亦都考慮到你嘅年紀，你自稱本身係家庭環境唔好，喺細個亦都有喺男童院，唔需要任何解釋嘅，冇任何小朋友鍾意喺男童院過生活，你冇經大律師講呢段事出嚟，都證明你根本都唔想再提，咁亦都會影響你日後成長嘅，咁當然所有呢啲個人嘅因素單獨嚟講，都唔係可以構成理由嘅。但係整體嚟講，加埋你家庭嘅背景，你爸爸嘅身體狀況、你家人對你嘅關心，法庭可以除咗三分一，再可以減免3個月，即係換句話講，判刑45個月。
|