香港特別行政區 訴 黃柏洛

DCCC254/2009

香港特別行政區

區域法院

刑事案件2009年第254號

----------------

----------------

----------------

判刑理由書

----------------

1.有關藏毒嘅案件係非常嚴重，尤其是你所藏有嘅毒品性質同埋份量，本席認為一般嚟講應該係判監禁，除非有特別嘅求情因素。你雖然唔係販毒，但係如果數量多嘅，有好大嘅可能性喺某個階段你會販毒，所以就算係普通藏毒案，上訴庭都認為，如果份量多同埋個毒品嘅性質，應該都係嚴懲嘅。咁所以實際上，本席只係有兩個選擇，一係就判你即時監禁，判刑起點起碼都係起碼1年或以上。或者從輕發落，畀個機會你戒除毒癮，改過自新。

2.本席不嬲都唔願意送呢類被告人去戒毒嘅，如果佢有表示唔願意，但係今日經過你嘅律師同你求情，你係願意戒毒，願意去戒毒所。加上另外一個好重要嘅求情因素，你年紀輕，同埋家庭背景嘅原因，令到你冇適當嘅家庭監管，咁所以本席認為應該畀一個機會，畀你改過自新，因為咁年青，如果判監禁，應該都係最後嘅處置方法，冇其他更適當嘅方法處理呢個被告。

3.基於以上種種原因，法庭決定畀一個機會你，而家判你去呢個戒毒嗰度，接受戒毒，要留案底。