香港特別行政區 訴 劉嘉寧
|
HCCC216/2009 香港特別行政區 高等法院 原訟法庭 刑事案件2009年第216號 ---------------- 香港特別行政區 訴 劉嘉寧 ----------------
-------------------------------------------- 判刑 -------------------------------------------- 官： 被告早於裁判法院承認三項搶劫（即係公訴書上嘅控罪一、二同四）同埋一項猥褻侵犯（控罪三），而家交由我懲處。 總括而言，控罪一係一宗獨立事件，涉及一名女事主；控罪二同三又係另一宗獨立事件，涉及另一名女事主；跟住控罪四亦唔例外。以上三案嘅案發日期合共不超過十八天。 情節方面，控罪一係商舖裡面發生嘅劫案，期間被告曾經亮刀，又箍過身為店員嘅事主嘅頸同掌摑過佢嘅臉，事後事主被驗出臉龐紅痛。 控罪二同三嘅事主係15歲嘅學生，喺回家途中畀被告尾隨到所住嘅屋苑某層箍頸，亮刀打劫，之後佢被脅持返屋企，但係畀佢機智咁避過，但係又畀被告帶至另一層嘅梯間猥褻侵犯。仲有，呢個侵犯嘅情節嚴重，包括綑綁事主雙手，撫摸對方胸部，以手指插入女方嘅私處，逼女方為自己手淫，用陰莖磨擦對方陰道，同最後向事主嘅裙射精。事後，事主被驗出兩手腕、頸部同埋右胸瘀青、右頸擦傷同割傷。仲要一提嘅係，被告喺控罪二同三所用嘅刀其實只係玩具，不過辯方唔反對佢嘅尖銳程度完全足以對人構成傷害，因此亦完全可以被用作威嚇別人嘅工具。 最後，控罪四就係被告藉詞睇屋，而向身為地產代理嘅事主行劫，事發地點係一個放租嘅樓盤裡面，期間被告不但用刀指嚇女事主，而且仲著令佢脫去身上嘅T裇，據稱係阻止後者追截，不過我哋唔使想，亦都知道咁樣會令事主感覺屈辱，所以構成加重嚴重性嘅因素。無論如何，事主喺被告正欲逃走嗰時候仍然追咗上去，並且同佢糾纏起嚟，結果左手遭割傷。 至於被告如何歸案，就係控罪四嘅事主喺睇樓之前，先攞取咗被告嘅身分證副本，經警方排查之後，喺案發翌日就成功將佢捕獲。此外，佢喺列隊認人手續中被涉案嘅事主認出。同樣控罪二同三嘅事主喺列隊認人手續中將被告認出，經核對之後，被告嘅基因亦都同呢位事主裙上所搵到嘅精液基因吻合。最後，控罪一就係被告喺被捕之後自己招認嘅。 背景方面，被告現時36歲，香港出生及受教育至中三程度，之後做過多份藍領工作，被捕時無業。此外，佢有一子一女，分別由兩名前妻所生，案發時則與女朋友同住。最後，佢有兩項前科，依次為與16歲以下女童性交同誤殺，不過受害人都係剛才所講嘅前妻或者親密嘅女伴。後者嘅判刑為10年，由2000年12月開始，06年8月完成。 求情嗰時候，律師公道咁講，除咗認罪，被告實在係冇咩嘢特別理由可要求減刑，辯方亦都承認我喺本案押後期間所索取嘅心理學家報告基本上係中立，對我嘅量刑幫助不大。 總括而言，我認為控罪一至四嘅量刑基準應依次為7年、6年、四年半、6年。被告認罪，可以得到三分一嘅減免，就下調至四年零八個月、4年、3年、4年。另外，控罪一既然係被告自己招認嘅，我會將佢嘅刑期再下調一年零八個月至3年，不過之後就再冇咩嘢減免嘅理由。尤其係控罪二同三，雖然同出於一宗案件，但係根據判例，各自嘅刑期就應該分期執行。然而，去到最後，我認為3年、4年、3年、4年，即係合共14年嘅總刑期會過重，所以決定將佢嘅上限設於10年。為達到呢個目的，我下令控罪一至三嘅刑期分期，之後則與控罪四嘅刑期同期，即係合共10年，就係咁。 |