香港特別行政區 訴 向展橒 Benson
|
DCCC542/2009 香港特別行政區 區域法院 刑事案件2009年第542號 ----------------
----------------
---------------- 判刑理由書 ---------------- 1.法庭認為首先處理咗第二項控罪嘅判刑比較適合。 2.第二項控罪販運危險藥物係好嚴重嘅罪行，就呢一類嘅毒品嘅性質，法庭冇一個特定嘅指引，但係販運危險藥物，一般嘅刑期本席認為應該係3年上限。法庭睇過你嘅律師嘅求情，講到你販運呢啲危險藥物嘅形式，照你嘅律師所講，講句誇張啲，你啲毒品就唔係賣，係愛嚟派街坊，街坊就係喺的士高嗰啲左鄰右里。當然，某個程度上，你冇賣「白粉」賺錢嗰啲人咁惡毒，你可能心腸比佢哋好好多，但實際上所造出嘅傷害仲多，你派畀人食，可能受者只係可能第一啖毒品，第一次食都好喇，或者你唔理會佢係第一次抑或第二次抑或冇錢食，姑勿論點都好，你要派畀人食，都係嚴重嘅罪行，所以本席認為個判刑起點就應該係兩年半。頭先已經提示過，無論證據強弱都好，因為你認罪，法庭一定要畀呢個三分一嘅寬免畀你。法庭認為你今次係第一次嘅入獄，判監就無可避免，第一次嘅坐監個震撼性係比較大啲，咁亦都係一個求情因素之一。你家庭背景、成長過程都係求情因素，但係我可以話畀你聽，就每用一次，呢啲求情因素就減弱一次，唔可以同一求情因素重複重複使用，希望法庭每一次都畀同一嘅寬免你。但係睇過你今次嘅特別情況，法庭認為可以再畀兩個月嘅寬免你，咁所以第二條控罪，判刑起點係兩年半，畀三分一你，再畀兩個月，變咗就係18個月。 3.第一條控罪，可以話畀你聽，就算係管有危險藥物，都係嚴重嘅罪行嚟，理由好簡單嘅啫，就算嗰啲危險藥物係你自己食嘅，係你自己用嘅，但係你管有呢啲藥物，都係有咁嘅危險，內在潛在嘅危險就係你愛嚟販運，因為正如好似你自己所承認嘅，你可能會派畀人食，咁所以一般管有危險藥物都係一種嚴重嘅罪行嚟，一般嚟講，應該就判監。法庭認為，如果判你監禁，可能又要費時失事，又要攞呢個戒毒所報告，戒毒所報告就好大可能都係話你唔適合，就算適合，法庭都唔會考慮判你去戒毒，因為你有第二條罪。 4.所以法庭就住整體性嚟講，認為第一項控罪罰款就可以足夠，咁法庭判第一條控罪罰2,000鈫，如果交唔到罰款，坐多14日監代替，分期執行。7天，7天期限畀錢。
|