案情指，警員喺一大廈外截查正獨自離開大廈嘅被告，搜身並冇發現，後來被告被帶返佢嘅房間，發現內有多種嘅毒品、電子磅同埋一啲透明嘅膠袋。被告承認單位內嘅毒品係販賣畀佢嘅朋友，佢又指，佢係以每0.6或0.7克，約500元嘅價錢將「冰」以及每片片劑以50至到60元嘅價錢售予他人。
毒品經過化驗之後，證實為20.02克嘅草木形態大麻、十片內含0.14克咪達唑侖片片劑、二十七片及一碎片內含0.17克甲基苯丙胺片劑、一片內含0.06克3,4-亞甲二氧基甲基安非他明片劑，以及27.86克晶狀固體、內含27.03克甲基苯丙胺鹽酸鹽、內含0.07克甲基苯丙胺嘅0.78克嘅片劑、內含0.54克海洛英嘅0.24克嘅鹽酸鹽以及1.28克嘅混合劑及一個載有內含甲基苯丙胺嘅微量粉末嘅金屬容器。所有嘅毒品市值為港幣24,099元。
被告現年40歲，一共有二十三項嘅刑事紀錄，其中十四項同毒品有關，包括一項嘅販運危險藥物罪，同埋十三項嘅管有危險藥物罪。佢最後一次嘅刑事紀錄係喺2009年5月6日，因為兩項喺獄中管有危險藥物罪，一共被判監禁18個月。
事實上，控方指出被告係喺去年11月18號被捕帶到法庭准以保釋，到本年2月9號因為本案被捕，所以本案係喺佢第十八項嘅刑事紀錄，即係及後喺2009年3月19號，因為管有危險藥物罪，而被判到戒毒所服刑，該案件擔保期間干犯。至於最後兩項案件，佢喺本案被拘捕之後，喺荔枝角羈留當天被發現衣袋內有一粒咪達唑侖，而喺翌日，再喺佢嘅排泄物中，搵到一粒海洛英鹽酸鹽。
大律師喺求情嘅時候表示，被告係有毒癮嘅人士，收入不足以應付毒品嘅支出，故此係為咗滿足佢嘅毒癮而犯案。
本席喺量刑嘅時候，考慮咗本案嘅案情、毒品嘅種類、重量以及量刑指引、被告承認控罪同埋大律師嘅求情。根據案例，本案涉及多種嘅毒品，而根據葉偉然一案，如果案件涉及販運多於一種毒品，現時多以組合量刑方法處理，即係法庭喺量刑嘅時候，首先考慮案中邊一種毒品係主要嘅毒品，予以適當嘅起刑點，然後因應另外毒品嘅重量，將適當嘅起刑點往上調整。而何謂主要嘅毒品，係視乎毒品嘅毒性，而並非重量。
本案嘅主要毒品係「冰」毒，一共涉及27.27克甲基苯丙胺鹽酸鹽，而根據量刑指引，應被納入10至到70克嘅起刑點範疇，即係介乎7至到10年。而草本大麻，根據楚雷（譯音）一案，2,000克以下嘅起刑點，不高於6個月，故此涉及有關嘅大麻以及其他嘅毒品嘅總重量，並不會大幅影響「冰」毒喺本案中嘅起刑點，導致需要由本來嘅等級進階至另外一個量刑界別。
上訴法庭喺張國良（譯音）Lowence一案中係咁講“We acknowledge however that it can be a difficult and complex task to sentence offenders who traffick in, or posses quantities of, a number of different drugs. In a case such as the present one the starting point should be based on the total narcotic content of the most serious drugs, or drugs where the tariff guidelines are co-equal.”
“ The sentencer should examine the nature and quantity of other dangerous drugs in the combination and, where warranted, make an upward adjustment of, say, 4-18 months from the starting point. Whether any such adjustment is warranted will depend on whether other narcotic quantities are sizeable, whether the other drugs come within the same, or lesser tariff, or whether adjustment would be pointless, given the starting point adopted or the relevant range of sentence.”
就本案嘅甲基苯丙胺，即係「冰」毒，本席認為一個8年嘅起刑點係適合。另外，考慮到其他有關毒品嘅重量以及毒品混合嘅毒性，本席認為，應該將上述嘅起刑點上調至八年半嘅起刑點。另外，本席認為，本案存在予以三分之一嘅認罪扣減外，可以給予額外扣減嘅特殊因素，喺本案嚟講，判刑5年。
另外，就住本案嘅刑期與及佢正在服刑嘅刑期嘅量刑整體性而言，首先，本案係喺KCCC 805/09案件擔保期間干犯，至於KCCC 1104同埋1105/09係被告喺本案被捕之後，喺荔枝角收押所干犯，雖然被告嘅大律師力陳，被告之所以係當時管有咪達唑侖以及海洛英，係因為本案被捕嘅時候，佢原本打算將啲毒品帶到街上吸食同埋一時情急之下吞下，但係喺獄中管有毒品嘅嚴重性，係在於被捕人士被帶到收押所嘅時候，懲教人員多番提醒以及詢問之下，仍然未能夠主動將管有一事披露。大律師強調，被告當時係由於毒癮發作，故此未能夠對懲教署人員嘅提問作出反應呢一點，從裁審官嘅量刑睇嚟，並未獲得接納。縱使如此，本席考慮咗量刑嘅整體性，下令本案刑期中嘅3個月同KCCC 1104/2009一案同期執行。