香港特別行政區 訴 劉錦燊

HCCC357/2009

香港特別行政區

高等法院

原訟法庭

刑事案件2009年第357號

----------------

----------------

----------------------

判刑

以下內容乃法庭數碼錄音謄本

----------------------

官：　被告承認一項販運危險藥物罪，違反香港法例第134章《危險藥物條例》第4（1）（a）及（3）條。

被告喺落馬洲入境之後被關員截查，從佢嘅內褲搜獲一個膠袋，內載六小包嘅危險藥物，有關嘅毒品經過化驗之後證實為181.59克混合劑，內含156.88克海洛英鹽酸鹽，市值十三萬元多港元。被告承認佢替人從深圳運送該些海洛英回港，會獲得3,000元嘅報酬。

被告現年59歲，未婚，有二十七次共四十項嘅刑事紀錄，其中十五項與危險藥物有關，最後一次係喺2003年12月4日，因為販運危險藥物被判監禁4年，佢喺2006年8月3日刑滿出獄。

大律師喺求情嘅時候表示，被告喺案發時候失業，因為一名喺內地嘅友人患病，受人唆擺，而希望藉此搵快錢而鋌而走險，干犯本案。大律師指被告喺本案最有力嘅求情因素係佢坦白認罪，希望本席予以輕判。

本席喺量刑嘅時候考慮咗本案嘅案情、毒品嘅種類、重量、有關嘅量刑指引，被告認罪，以及大律師嘅求情，亦都閱讀咗被告撰寫嘅求情信。根據量刑指引，販運海洛英鹽酸鹽重量50至到200克，起刑點係8至到12年，就販運本案嘅156.88克嘅海洛英鹽酸鹽而言，本席認為一個十年半嘅起刑點係合適嘅，予以三分之一嘅認罪扣減，判刑7年。