香港特別行政區 訴 莊國雄
|
HCCC153/2008 香港特別行政區 高等法院 原訟法庭 刑事案件2008年第153號 ------------------
------------------
判刑 官：被告原本被控六項搶劫罪，佢承認其中四項，即係公訴書上嘅控罪一、二、五同埋六，其餘嘅就獲准留至法庭嘅卷宗。 控罪一、二同五嘅案發日期都喺06年10月，控罪六則為07年6月，事主全部都係俗稱「一樓一鳳」嘅妓女，喺被告發難前，都向佢提供過性服務。至於被告點樣發難，就係從後箍頸，聲稱「打劫」，呢個無論控罪一、二同六都係咁，只有控罪五係例外，不過嗰次都有箍住事主嘅身體。此外，被告亦喺控罪一同五綑綁過受害人，同埋用布塞住佢哋嘅口。最後，被告被捕，係由警方喺控罪五嘅現場搵到佢嘅指模，識破佢嘅身分。事實上，警方喺控罪二同控罪五嘅避孕套裡面，都搵到佢嘅DNA。控罪一、二同六嘅受害人，又喺列隊認人手續裡面將佢認出。 背景方面，被告今年24歲，香港出生，並受教育至中二。之後做過運輸工人，被捕前無業，同父親同住。最後，佢有七次共八項前科，其中涉及嘅罪行有襲擊他人、非法管有未完稅貨品、與未成年少女發生性行為同埋猥褻侵犯等，此外就係一項盜竊。佢最後一次出獄係06年4月，亦即係控罪一、二同五發生前約半年。 求情嘅時候，律師話被告係因為經濟嘅原因，所以先犯下呢幾件案件。佢話控罪一嘅受害人冇報警，案件得以揭發，係因為被告主動向警方提及。呢兩點，前者於事無補，後者則對被告有利。總括而言，被告嘅罪行係嚴重嘅，量刑起點起碼應該為5年。控罪一同五涉及綑綁同以物件塞口，就更應該上升為6年。不過由於被告認罪，控罪一、二、五、六嘅刑期，就可以依次下調三分一至到4年、三年零四個月、4年同埋三年零四個月。控罪一係被告自行揭發嘅，就更加可以再下調至3年。即係話一、二、五、六嘅刑期，應該係3年、三年零四個月、4年同埋三年零四個月。 最後，涉案嘅罪行全部係獨立事件，所以刑期理應分開執行。不過，根據數罪並罰不能過重嘅原則，我會將個總刑期定喺9年呢個上限。為達致呢個結果，我下令控罪二同控罪一同期，即係三年零四個月；跟住控罪五，同佢哋分期，夾埋就係七年零四個月；最後，控罪六嘅刑期，部分同以上嘅刑期同期，其餘嘅分期，總之就要達致9年。
|