香港特別行政區 訴 蔡炘伶
|
HCCC314/2009 香港特別行政區 高等法院 原訟法庭 刑事案件2009年第314號 ----------------
----------------
------------------------------------------- 判刑 ------------------------------------------- 官： 被告承認一項販運危險藥物罪，違反香港法例第134章《危險藥物條例》第4（1）（a）及（3）條。以及一項管有危險藥物罪，違反香港法例第134章《危險藥物條例》第8（1）（a）及（2）條。 案情指被告喺單位外被警員截查，喺佢嘅褲袋搜獲煙盒，內載兩大包毒品。其中一包內有二十四小包毒品。被告喺警誡下話啲四仔係佢自己食嘅，啲「冰」就諗住畀人嘅。毒品經過化驗之後，證實為11.30克晶狀固體，內含10.77克甲基苯丙胺鹽酸鹽，以及5.19克混合劑，內含3.34克海洛英鹽酸鹽。 被告現年31歲，之前有兩項嘅刑事紀錄，均涉及危險藥物。喺1999年佢曾經因為販運危險藥物罪被判監禁40個月，喺獄中完成中五，獲釋之後有穩定工作。但係大律師指佢喺2008年卻因為管有藍精靈而被判罰款，其後認識咗新男友，二人共賦同居，由於男友亦都係癮君子，所以佢再度沾上毒癮。佢係為咗經濟原因以及需要支持佢嘅毒癮而鋌而走險，干犯本案。佢係打算購入毒品出售予其他癮君子嘅。但係大律師續指，被告人今次犯事之後父母與及男友對佢不離不棄，希望本席能夠寬大處理，好讓佢早日獲釋，重新做人。 本席喺量刑嘅時候考慮咗本案嘅案情、毒品嘅種類、重量、有關嘅量刑指引、被告承認控罪、大律師嘅求情，亦都閱讀咗被告所撰寫嘅求情信。就第一項控罪而言，根據量刑指引，有關嘅「冰」毒重量係10.77克，起刑點界別為7至到10年。本席認為就該項控罪而言，七年嘅起刑點係適合嘅，予以三分之一嘅認罪扣減，判刑56個月。至於第二項管有危險藥物罪，本席以18個月作為起刑點，予以三分之一嘅認罪扣減，判刑12個月。本席考慮到即使將控罪二嘅海洛英當作「冰」毒以及當作販運用，兩者毒品總重量計算在內，所有嘅毒品係重13.77克，並不會導致到「冰」毒嘅量刑從此上述指引嘅等級進階到另一等級，亦不會對原先第一項控罪嘅起刑點造成具差別性嘅影響。故此下令兩項控罪嘅刑期同期執行。 |