香港特別行政區 訴 梁均標

HCCC418/2009

香港特別行政區

高等法院

原訟法庭

刑事案件2009年第418號

----------------

香港特別行政區

訴

梁均標

----------------

--------------------------------------------

判刑
以下內容乃法庭數碼錄音謄本

--------------------------------------------

官： 被告早於裁判法院承認過兩項販運危險藥物罪，而家交由我懲處。

同意案情，指被告被高空巡邏嘅警員喺一座大廈嘅樓梯位截停，發現身藏兩袋以淨含毒量計為21.96克嘅氯胺酮。經警誡下，佢承認要將嗰批毒品賣畀一個預先約定嘅人，呢個就係控罪一。

至於控罪二，就係警方帶被告返屋企搵到餘下嘅毒品，亦即係以淨含毒量計151.28克嘅氯胺酮。被告喺警誡下承認呢批毒品都係愛嚟出售嘅。

背景方面，被告現時十六歲零七個月，大陸出生，8歲嚟到香港，之後喺度授教育至中二程度，據稱就係被捕前年半左右嘅事。被捕嗰個時候，亦據稱剛完成一個訓練局嘅甚麼電子課程。佢冇前科。同父母，同兩個姐姐同住。

求情嗰個時候，律師話佢犯案係想搵快錢幫助家計云云，不過，呢啲講法就算係真嘅，亦唔係啲咩嘢有效嘅求情理由。

我認為本案兩項控罪嘅毒品合共173.24克咁多，一個合適嘅量刑基準就係七年半，不過被告年輕、冇前科，我就酌情將佢下調至六年半。被告認罪再可以得到三分一嘅扣減，就係四年零四個月，不過之後就再冇有效嘅求情理由。為達致呢個目的，被告需要為控罪一入獄三年。又為控罪二入獄四年零四個月，同期執行，亦即係合共四年零四個月。