香港特別行政區 訴 關柏祥

HCCC245/2009

香港特別行政區

高等法院

原訟法庭

刑事案件2009年第245號

----------------

----------------

--------------------------------------------

判刑
以下內容乃法庭數碼錄音謄本

--------------------------------------------

官： 被告原被控一項強姦，經審訊之後未能得出大比數裁決，結果喺解散陪審團之後，獲控方接受佢對猥褻侵犯認罪，而家由我懲處。

同意案情指，被告對路過晨運嘅女事主突生歪念，從後將佢掩眼推入草叢，事主反抗不成，咬佢隻手，被告仲打咗事主塊面兩下，叫佢唔好嘈，令事主再唔敢反抗。就係咁，被告對事主大肆非禮，例如係揭起佢嘅上衣，侵犯事主兩邊乳房，然後又用口去所謂吸啜，此外被告亦有伸手入事主嘅下裳，並一度用手指插入對方嘅陰道3至4厘米，亦即係約一吋半，最後被告仲自瀆同喺事主嘅陰部射精。

事後30歲嘅女事主被發現左邊面頰、兩片嘴唇及兩條小腿有輕微傷勢，係被侵犯嘅過程當中造成嘅。

背景方面，被告現時34歲，香港出生，及受教育至中三之後做過多項工作，被捕時係送肉工人。此外，被告已婚，有兩項前科，不過同本案嘅性質完全唔同。

求情時律師指，本案冇特別加重嚴重性嘅因素，相反，被告只係一時衝動而犯下有關嘅罪行，此外就係佢有悔意等等。

對於辯方指被告一時衝動，控方唔反對，我亦接受嘅，非常之明顯，案發地點並不隱蔽，所以同其他匿藏喺屋邨嘅暗角而有預謀地犯案嘅一般情況係唔同。然而，被告趁住清晨6點途人稀少，對陌生女子貿然侵犯，行為唔可以話唔令人髮指嘅，此外，佢曾經使用暴力，對女事主所做嘅事情亦相當猥褻，所以絶對唔係一啲常見嘅案件。

喺參考過HKSAR v Lam Tim Lung CACC 212/99及HKSAR v Au Keung Siu Kay CACC 276/2001兩件案件之後，我認為一個三年半嘅基準會合適，被告喺審訊之前已經承認非禮，可得足三分一嘅扣減，就下調至兩年零四個月，不過之後就再冇減免嘅理由，我宣判被告需要為本案入獄兩年零四個月。