香港特別行政區 訴 陳煒炎
|
DCCC272/2010 香港特別行政區 區域法院 刑事案件2010年第272號 ----------------
----------------
---------------- 判刑理由書 ---------------- 1.起立。法庭認為就不必要攞呢個社會服務令報告，法庭可以假設以你咁好嘅家庭背景，以你求情信入面所透露嘅內容，同埋法庭都可以猜測到你係會適合呢個社會服務令嘅，只不過法庭認為呢啲案件嚴重，法庭唔會考慮判呢個社會服務令。 2.你自己係有學識嘅人，喺呢個行業係有一定嘅經驗，你亦都知自己嘅權利。華寶又相信你，你僱主係講整間公司嘅名譽，唔係單單老闆個人，唔係你師父一個人。你自己嘅行業，你應該知道，誇張啲講就係操生殺之權，要倚靠你上報工程嘅項目，到呢個China State批准咗，咁然後你仲要偽造文件，如果你考慮周詳，考慮下華寶公司嘅困境，你都唔應該做，唔好講話你要自己有個專業嘅操守。 3.如果係講公司有困難，我諗華寶嘅困難同你公司應該都係面對同一環境，咁所以就算你係本身個人，我認為你係太過順得人意，可以咁講，可能想做到面面俱圓，但係點解你咁樣要犧牲華寶利益呢？法庭從你呢個求情說話睇唔到，只可以猜測，即係正如你律師所講，你尊重你嘅師父，自己選擇犧牲華寶利益，因為你係尊師重道，因為你係怕失咗份工，所有呢啲嘢，某個程度上都係自私，因為自己好過啲，做咗對得住師父，又可以保住份工，既然自私，就要承擔後果。 4.所有人都講，所有律師都係咁講，希望法庭畀個更生機會你，自新機會。自新機會係你自己嘅，唔係法庭畀嘅，法庭冇得派。無論法庭重判、輕判，你都有機會改過自新嘅，通常個個都唔經大腦都係咁講，要法庭畀個改過自新嘅機會，冇話自己爭取自新機會。 5.本席認為呢啲案件就非常之嚴重，除非係好特殊情況，個人嘅品格或者其他情況，係應該判即時監禁。法庭接納你嘅律師所講，整件案策劃只係一個，工程又係一個，即係可以講可以整體性嚟睇呢個量刑起點。法庭考慮到你本身扮演嘅角色，你本身有嘅專業操守，唔計其他嘅因素，單係呢種因素，法庭認為個量刑起點就應該24個月。咁你喺法庭認罪，法庭一定要畀三分之一嘅減免，無論你係後悔、唔後悔，本席冇任何選擇，都要畀三分一嘅寬免你。 6.咁本席亦都重申，呢個既然上到法庭，可以得到三分一減免。如果你有另外一個同案被告，舉例或者係你師父，你師父由頭至尾都唔認，譬如如果佢都有份嘅，佢由頭至尾都唔認罪，令到呢個ICAC嘥好多時間。嚟到法庭同你一樣認罪，係有三分一減免，你亦由頭至尾係認罪，我又接納呢樣嘢嘅，咁又係得三分一減免，任何人都覺得唔公道。點解呢個由頭至尾都唔後悔，只不過純粹上嚟認罪，即係想攞三分一折扣；你除咗一早認罪，又真係有悔意等等，咁所以法庭認為如果你係同ICAC合作，一早後悔認罪嘅，法庭認為係可以有額外嘅寬免。當然，法庭要考慮到就係已經係畀咗三分一寬免，就唔可以再畀太多嘅寬免。 7.法庭亦都考慮到其他你嘅求情因素，你本人嘅品格其他方面係無懈可擊，唔需要重複為你寫求情信人士嘅睇法。你啲朋友、親戚、社交活動接觸你嘅人都對你有好感，呢樣嘢無可質疑嘅。法庭亦都考慮到你係冇案底，以前亦都未入過獄，咁所以今次第一次監禁所受嘅苦況、難受程度比坐過監嘅人一定係大，呢啲都係求情因素，咁所以法庭認為同ICAC呢個合作，同埋悔意，應該加埋畀多3個月嘅減免。關於你自己個人嘅求情因素，頭先都講過，品格同埋除咗對師父愚忠，忽略呢個華寶嘅利益之外，其他尤其是品格亦都應該得到法庭另外3個月嘅減免。 8.即係換句話講，額外得到6個月，總數6個月減免，即係換句話講，24個月減14個月返嚟係10。每條控罪10個月監禁，同期執行。
|