香港特別行政區 訴 梁浩天
|
DCCC106/2010 香港特別行政區 區域法院 刑事案件2010年第106號 ----------------
----------------
---------------- 判刑理由書 ---------------- 1.本案嘅被告人被控一項與年齡喺13歲以下嘅女童非法性交罪，佢起初否認控罪，但喺女童作供完畢之後，被告人改變原先嘅答辯，承認控罪，並同意控方就控罪所預備嘅案情撮要。 2.案情指，女童喺案發嘅時候只係有12歲，佢係喺2008年嘅暑假期間，同被告人透過互聯網認識，佢當時已經話咗畀被告人聽佢嘅年齡，後來兩人發展成為男女朋友關係，但數日之後分手。2009年初，兩人復合，並且再次約會。事發當日，女童應約到被告人屋企，當時被告人嘅一名女性朋友亦都在場。其後，女童與被告人發生性交，被告人當時冇戴上避孕套，但係佢係喺女童體外射精。法醫後來檢驗女童嘅時候，發現佢嘅處女膜有一處完整嘅舊破裂痕。 3.傅大律師為被告人求情嘅時候指，案發時被告人年齡只有18歲（其實係18歲4個月咁上下），佢現時亦都只係十九歲幾。被告人接受教育至中五程度，佢未婚，父母離異，佢同媽媽同埋妹妹同住，哥哥就搬出咗去另外一個地方居住。被告人喺2008年曾被判藏有危險藥物，當時係罰款2,000元。傅大律師指，嗰宗案涉及嘅係俗稱「K仔」嘅毒品，但係被告人聲稱佢而家已經冇再接觸任何毒品。 4.就本案被拘捕之前，被告人曾接受搭棚或者係建築技術嘅訓練，並喺建築地盤工作。 5.為提取報告以協助法庭考慮適合嘅刑罰，本席押後判刑至到今日。有關報告顯示被告人並不適宜進入勞役中心，亦都不適宜判處社會服務令。就被告人嘅精神同埋體力狀況而言，報告顯示，教導所同埋更生中心兩者都係適合嘅，但係考慮到被告人嘅背景同埋相關資料，與及佢喺被羈押時嘅態度同埋行為，報告認為更生中心對被告人就較為合適。 6.與年齡喺13歲以下嘅女童非法性交係嚴重嘅罪行，因為年幼女童心智尚未成熟，必須受到保護，以免佢哋被利用或者係被引誘，做一啲損害自身嘅事情。就本案嘅控罪而言，法例所訂嘅最高刑罰係終身監禁。而以一個成年罪犯嚟講，就算佢先前並冇任何嘅刑事紀錄，就算佢坦白認罪，一般亦會判處監禁嘅刑罰。本案嘅被告人先前已經有一次與毒品有關嘅刑事紀錄，但係佢聲稱佢而家已經冇再接觸毒品。 7.被告人與本案女童係男女朋友關係，佢哋嘅年齡分別並唔算好大，被告人亦都係喺呢個男女朋友嘅關係之下同女童發生性交，其中亦都冇牽涉任何金錢上面嘅交易，犯罪情節可以講係較為輕微嘅。而由於女童喺同被告人發生性行為嘅時候，係以女朋友嘅身分行事，本席相信呢次嘅事件，應該唔會對女童心理上面造成太大嘅傷害。 8.雖然被告喺女童作供之後先至承認控罪，但係考慮到佢嘅年齡、背景、所有相關嘅情節、佢嘅求情因素同埋佢屋企人同佢嘅支持，本席決定畀被告人最後一次改過自新嘅機會。故此，本席判處被告人到更生中心。
|