香港特別行政區 訴 陳子聰

HCCC149/2010

香港特別行政區

高等法院

原訟法庭

刑事案件2010年第149號

---------------------------------

--------------------------------

-------------------------------------------------

判刑

以下內容乃法庭數碼錄音謄本

-------------------------------------------------

官：　被告早於裁判法院承認過一項販運危險藥物罪，而家交由我懲處。

同意案情指，警察喺街上發現被告，經過短暫觀察同跟蹤之後將佢截停，結果喺佢手上嘅一個紙袋搵到涉案毒品，即係以淨含毒量計185.05克嘅氯胺酮。被告喺警誡下，承認為錢而替人帶毒，被截嗰時候正在運送。

被告現時16歲，仲有大約四個月17歲，加拿大出生，之後返香港，曾經受教育至中二，不過係留級幾次，被捕嗰時候據稱係讀緊展翅，同母親同姐姐同住。此外，佢係冇前科嘅。

求情嗰陣時，律師話被告年少無知，一時被損友利用，而家深知悔過，然而，呢啲都唔係有效嘅求情理由嚟。尤其要指出嘅係被告家境最少都屬小康，供應係無缺嘅，被告犯事完全係自己把持不定，咎由自取嘅。

觀乎涉案毒品嘅數量，我認為應該以七年半作為本案嘅量刑起點，被告認罪，可以得到三分一嘅扣減，就下調至5年。不過我體諒被告雖然不至極度年幼（extreme youth），不過實情亦只係得十六七歲，所以酌情（係完全酌情）再將刑期下調半年至到四年半，就係咁。