香港特別行政區 訴 陸汶駿

HCCC116/2010

香港特別行政區

高等法院

原訟法庭

刑事案件2010年第116號

----------------

-----------------------------------------------

判刑

以下內容乃法庭數碼錄音謄本

-----------------------------------------------

官：    被告承認一項販運危險藥物罪，違反香港法例第134章《危險藥物條例》第4（1）（a）及（3）條。

案情指，警員喺大廈梯間埋伏，睇到被告同埋另外一名男子企喺個單位外，警員截查被告，喺被告手持嘅膠袋內發現七袋毒品，被告承認該些毒品係「K仔」，佢係幫人攞嘅，會賺到500鈫。其後警員搜查該單位，並冇任何發現。

被告喺錄影會面嘅時候表示，佢因為急需錢用，所以替朋友運送毒品，而當時佢係用朋友畀佢嘅兩條鎖匙，開啟咗單位嘅大門，從單位內取出數包「K仔」，離開嘅時候被捕。

毒品經過化驗之後，證實為174.19克粉末，內含145.64克氯胺酮，當時估計嘅零售價係19,509鈫。

被告現年22歲，曾經有三次嘅刑事紀錄，有一次係涉及管有危險藥物，被判十八個月嘅感化令。大律師喺求情嘅時候表示，被告喺中二之後做過不同類型工種嘅學徒，喺去年11月之後失業。大律師指，被告係急於賺快錢先受人唆擺，誤入歧途，干犯本案嘅，而被告喺被捕之後與警方合作，第一時間認罪，希望本席能夠予以一個較低嘅起刑點，從輕發落。

本席喺量刑嘅時候考慮咗本案嘅案情、所涉及嘅毒品嘅種類、重量、有關嘅量刑指引、被告認罪以及大律師嘅求情。就住所涉及嘅係145.64克氯胺酮，根據許守城案嘅量刑指引，係納入50至到300克，即係監禁6年至到9年嘅量刑界別，本席採取七年半嘅起刑點，予以三分之一嘅認罪扣減，判刑5年。