香港特別行政區 訴 洪健榮
|
HCCC272/2010 香港特別行政區 高等法院 原訟法庭 刑事案件2010年第272號 ----------------
----------------
-------------------------------------------- 判刑 -------------------------------------------- 官：被告承認一項販運危險藥物罪，違犯香港法例第134章《危險藥物條例》第4（1）（a）及（3）條。 案情指，警員喺路障截查被告駕駛嘅私家車，從右車廂搜出二十四包毒品。被告承認嗰啲危險藥物係「K仔」，並聲稱呢啲係佢同日早前購買，供佢自用。毒品經過化驗之後，證實為289.53克粉末內含246.55克氯胺酮。 被告現年21歲，過往有三次嘅刑事紀錄，全部係涉及管有危險藥物，喺2007年10月被判到更生中心服刑。 大律師喺求情嘅時候表示，被告喺更生中心獲釋之後，喺一間日本餐廳工作，其後失業，因為經濟壓力，又經不起損友唆擺而鋌而走險，以為可以藉住販運危險藥物賺快錢而干犯本案。大律師又指，被告對於今次犯事深感後悔，並已經第一時間認罪，彰顯佢嘅悔意，希望本席能夠從輕發落，讓佢早日獲釋，重新做人。 本席喺量刑嘅時候，考慮咗本案嘅案情、毒品嘅種類、毒品嘅重量、有關嘅量刑指引、大律師嘅求情，亦都閱讀咗被告以及香港中華基督教青年會青少年外展社會工作隊隊長所撰寫嘅求情信。本案涉及嘅係246.55克嘅氯胺酮，根據許守誠嘅量刑指引，販運50至到300克嘅氯胺酮，起點6年至9年。 就本案所涉及氯胺酮而言，本席採納一個8年嘅起刑點，予以三分之一嘅認罪扣減，判刑64個月。 |