香港特別行政區 訴 章思源

DCCC112/1996

香港特別行政區

區域法院

刑事案件1996年第112號

----------------

----------------

判刑理由書

----------------

1.而家只係就住案件裡面嘅唯一第四控罪嚟到去判刑，呢個係被告人經過佢自己控罪同埋同意有關嘅事實之後係被定罪嘅。呢條控罪所告佢嘅就係話，根據《刑事訴訟程序條例》第9L（1）同埋（3）條，指被告人冇合理嘅因由而冇按照法庭嘅指定歸押。

2.詳情就話張先生喺96年5月13日喺香港，身為獲准補釋嘅人士，冇合理因由而冇按照區域法院嘅指定歸押嘅，控罪喺區域法院處理嘅情形之下嘅最高刑罰係監禁12個月同埋一個冇定額嘅罰款。我嘅睇法係呢一個控罪就似乎係你一係就干犯，一係就冇干犯，當然我嘅意思係冇一個好寬闊嘅嚴重性可以走盞，即係唔會話你點樣走法會嚴重啲、幾時走嚴重啲咁樣，似乎我嘅睇法係，唔係太寬闊嘅一個嚴重性可以考慮嘅。而辯方亦都呈遞咗呢個案例HKSAR v Lam Kin Chung〔2007〕2 HKC 451畀我考慮，上訴庭當時似乎亦都有考慮到一啲嘅因素就係話，喺嗰個案件裡面嘅上訴人，除咗係上次逃避呢個審訊之外，亦都係逃避一個可能性就係話，審訊之後被定罪的話，佢嘅一個正在緩刑嘅刑期可能會被執行。

3.另外嗰個案例裡面，當其時上訴人再去被重新拘捕嘅時候係經過咗九年，但係我哋呢個案件裡面就係經過一個相對嚟講比較長啲嘅時間，成十五、六年。當然我哋呢個案件裡面，被告人並冇話一個緩刑嘅命令在身當其時，據我所了解就係，被告人今次返嚟香港純粹係佢嘅妹妹就係攞到一個單程證，咁就希望被告人可以返嚟香港一齊，當然被告人自己亦都有一個12歲嘅兒子，希望佢能夠嚟到香港，享受一個香港公民嘅權益，同埋可以喺香港生活嘅。

4.根據控方同我講，嗰個控罪一、二同埋三點解不提證供起訴呢，純粹係基於一個證據嘅考慮，而似乎唔係因為話時間過得太耐做唔到，唔係咁嘅情形。

5.我考慮到任何人必須好嚴肅咁樣去對待法庭關於需要歸押嘅命令，唔可以話走就走嘅，咁但係同一時間亦都考慮到被告人佢所謂嘅刑事定罪紀錄，其實都係好多年前，同埋係一個好輕微嘅罪行，只係罰款5,000鈫處理咗嘅啫。咁我亦都考慮案例Lam Kin Chung裡面，上訴庭認為喺嗰個類型咁嘅案件，9個月嘅判刑起點會係合適嘅。

6.我嘅睇法係，我會用9個月嘅判刑起點嚟到處理被告人，因為被告人係承認控罪，我係畀你三分之一嘅扣減，扣減咗係6個月嘅即時監禁。