官： 被告承認兩項販運危險藥物罪，違反香港法例第134章《危險藥物條例》第4（1）（a）及（3）條。案情指警員喺被告正在一單位步出嘅時候截查被告，並喺佢前褲袋搜出一袋毒品，後知為11.28克粉末嘅9.71克氯胺酮。被告喺警誡之下承認打算將毒品運送畀他人。
其後，警員進入單位搜查之後，發現一袋393.78克嘅粉末，內含336.14克氯胺酮，另外三袋載有內含1.36克甲基苯丙胺鹽酸鹽嘅1.38克晶狀固體、三個錫紙包，載有24片內含0.17克硝甲西泮嘅片劑、一個沾有微量氯胺酮粉末嘅膠羹、一個電子磅以及多個可再封口嘅透明膠袋。被告喺警誡下承認購入有關嘅毒品並會分拆成小包出售。
被告現年21歲，共有十項嘅刑事紀錄，有七項與毒品有關，最後一次係喺2010年4月29日，因為襲擊警員以及管有危險藥物等嘅控罪被判到戒毒所服刑。本案係佢喺2010年1月干犯該些控罪嘅時候擔保期間，棄保潛逃嘅時候干犯。大律師喺求情嘅時候表示被告來自單親家庭，成長期間父親對佢疏於管教，其後父親因為工傷不能工作，只能夠靠綜援度日，家庭經濟拮据，被告受損友疏擺，把持不定，希望搵快錢先會鋌而走險，干犯本案。大律師續指本案最大嘅求情因素係被告人坦白認罪，希望本席能從輕發落。
本席喺量刑嘅時候考慮咗本案嘅案情、毒品嘅種類、重量、有關嘅量刑指引、被告承認控罪以及大律師嘅求情，亦都閱讀咗被告父親所撰寫嘅求情信。根據許守城案嘅量刑指引，販運300至到600克氯胺酮嘅起點係9年至到12年。本案另涉1.36克嘅「冰」毒以及0.17克嘅硝甲西泮片劑嘅重量，並不會令有關嘅起刑點進階至另外一個界別。就本案兩項控罪所涉及嘅所有毒品，本席係以九年三個月作為起刑點，給予認罪嘅三分之一扣減，判刑六年兩個月，分配如下：控罪一，兩年八個月；控罪二，六年兩個月，同期執行。