香港特別行政區 訴 畢卓源

HCCC294/2010

香港特別行政區

高等法院

原訟法庭

刑事案件2010年第294號

----------------

----------------------

判刑
以下內容乃法庭數碼錄音謄本

----------------------

官：　本案被告承認一項販運危險藥物罪，違反香港法例第134章《危險藥物條例》第4（1）（a）及（3）條。

案情指，警員喺被告同朋友正在開啟一個單位大門嘅時候出示搜查令，進入單位搜查之後，發現兩個大膠袋同埋十六個細膠袋載住毒品，另外有一個電子磅及多個可再封口嘅透明膠袋。被告喺警誡下，承認管有有關嘅毒品，而毒品經過化驗之後，證實為388.24克粉末，內含331.26克氯胺酮，毒品總數量當時嘅零售價估計為港幣46,200元。

被告現年17歲，過往有六次嘅刑事紀錄，但係冇販運危險藥物嘅前科。最後一次嘅刑事紀錄係喺2008年3月13號被判到更生中心，喺2008年7月29日獲釋。

大律師喺求情嘅時候表示，被告一被捕已經招認有關嘅控罪，而喺裁判法院亦都第一時間認罪，彰顯佢嘅悔意。大律師續指，被告係因為家庭經濟捉襟見肘，金錢誘惑，加上誤交損友，先至會鋌而走險，干犯本案。佢亦都明白將會面對頗長嘅牢獄生涯，佢會洗心革面，積極進修，希望獲釋之後重新做人，回饋社會。

本席喺量刑嘅時候，考慮咗本案嘅案情、毒品嘅種類、重量、有關嘅量刑指引、被告認罪、大律師嘅求情，亦都閱讀咗有關嘅求情信件。根據許守城案嘅量刑指引，販運300至到600克氯胺酮嘅起刑點係由9年至12年，本席以9年作為本案有關毒品嘅起刑點。本席滿意本案存在住可令本席寬大處理額外嘅特殊情況，判刑5年。