案情顯示，喺今年4月13日，當時有一隊嘅警察人員執行反毒行動，被告就係喺夜晚十點幾鐘嘅時候，喺弼街後巷度形跡可疑，咁就畀兩名警員截停咗。搜咗身之後就發覺佢身上喺褲袋嗰度─有兩包當時懷疑係氯胺酮嘅。咁被告就話畀警員聽，佢係幫人帶啲「K仔」，咁跟住就畀差人拉咗販運危險藥物嘅罪名。喺警誡之下，被告人就承認佢幫人帶啲「K仔」係賺錢嘅，咁仲話埋畀警方聽，其實喺華園大廈嘅3樓嘅後樓梯度就有更加多嘅毒品，咁就帶咗差人去嗰個地方。當時被告係自己將大廈鐵閘嘅密碼話畀警員聽，然後先入到入面嘅，跟住就去晒3樓，咁喺3樓嗰度，被告就指出咗喺牆上有一個電線嘅箱，於是警員就搜嗰個電線箱，發覺入面係有個膠袋，膠袋入面有十六包嘅懷疑係氯胺酮，同埋有一個可再封嘅膠袋，入面有其他多個嘅可再封口嘅膠袋，同埋有一個電子磅添。於是警員就再拉被告第二項販運危險藥物嘅罪名，喺警誡之下，被告就話有人就係叫佢睇住，即係將嗰啲嘅毒品擺喺嗰度，咁有買家嘅時候，佢就需要去送貨喇咁。
後屘拉咗佢返去差館之後，就有進行過一個錄影會面嘅，咁喺呢個錄影會面，被告人向警方透露多一啲關於係點樣干犯咗呢件案件。咁佢話有個朋友就介紹即係另外一個人叫做阿傑嘅畀佢識，呢個阿傑因為知道當時被告係冇嘢做、冇錢，所以佢就叫個被告話不如幫佢帶毒品，咁當時嗰個情況就係，如果帶包係大嘅，即係話28克嘅，咁就會有200鈫，如果喺旺角區內就有200鈫運一包，帶咗出去喺旺角區以外就300鈫一包，如果帶嗰個係包細嘅，即係話係14.50克嘅毒品，咁嗰個分別就係，喺旺角區內就100鈫一包，旺角區外就150至200鈫一包。被告自己向警員供出就係話，喺拉之前大概三十分鐘喥，阿傑就係叫佢去送貨，就送兩包去畀個客，咁就於是被告人自己就係用嗰個電子磅磅過啲氯胺酮，秤咗夠喇，擠咗入去兩個可再封口嘅膠袋，咁就出咗去，跟住就畀差人拉咗喇。
而當時喺被告身上同埋喺嗰個電線箱入面搵到嗰啲懷疑係氯胺酮嘅物品，就拎咗去政府化驗室度化驗，化驗之後就發覺證實真係係氯胺酮嚟嘅，咁夾埋晒就係有276.57克，係一啲粉末嘅混合物，而氯胺酮嘅成份係178.71克，咁而當時嘅市價大約係三萬三千鈫喥。咁呢個就係案情。
關於被告嘅背景方面，被告而家係17歲，冇先前嘅犯罪紀錄。其實如果睇番被告嗰個出世日期，喺4月嘅時候即係未夠17歲嘅，嗰陣時係十六歲幾，仲有三個月（才十七歲）。就當然未結婚喇，咁細個。喺被捕之前，就係同父母住喺呢個何文田區嘅。而讀書讀到去中二就輟學喇，跟住出嚟就曾經喺餐室、又喺啲酒吧、廚房咁樣做過工作嘅，拉嗰時就係冇工作做，失業嘅。
咁喺求情方面，被告嘅代表周大律師喺求情嘅時候，就遞咗三封求情信畀本席睇，一封來自被告以前Form 1嘅老師，一封就係來自被告嘅二哥，一封係來自被告本人。周大律師話畀本席聽，被告爸爸其實已經八十幾歲，媽媽就六十幾歲，咁而啲哥哥同埋一個姐姐冚唥都二十幾歲㗎喇，被告就係因為同呢個其他嘅兄弟姊妹之間年齡嗰個嘅隔膜，就變咗同佢哋唔係話咁親密嘅，咁而父母好明顯因為被告干犯咗呢件事，都非常之震驚同埋好傷心，不過佢哋都嚟到法庭度支持被告你嘅，咁而呢個二哥亦都係有嚟到法庭支持，同埋亦都寫咗求情信。本席可以睇到呢幾封嘅求情信，尤其係先生同埋哥哥所寫嘅都顯示到話，被告本質就唔係話一個咁壞嘅人嚟，咁佢就誤交損友、畀人利用，所以干犯咗而家呢件嘅案件。
周大律師接受呢件案件係喺上訴庭所訂立咗嘅案例入面嘅指引之中，即係唔係話嗰啲可以唔跟案例嘅案件，不過周大律師都要求本席盡量用一個輕啲嘅量刑起點。
販運危險藥物係非常之嚴重嘅罪行，咁而通常被捕人係需要接受非常之嚴重嘅懲罰，而上訴庭喺許守城呢件案例，上訴庭已經係就販運氯胺酮係畀咗量刑嘅指引，咁而販運嗰個份量係50至到300克，量刑起點就喺6至9年呢一個範疇。
咁可以睇到，憑老師同埋憑阿哥所講，就真係睇落係似呢個被告人被人哋利用咗，干犯咗而家呢件咁嚴重嘅案件。不過又睇番根據被告人自己嗰個承認，就唔係凈係幫人帶咁簡單喎，即係唔係凈係人哋畀包你、你拎去咁簡單，因為你自己都承認，其實你係有份直情用埋個秤去秤埋一個恰當嘅份量，即係大定細，咁然後放落個袋度，先至拎去。即係你喺呢件案件你所做嗰個嘅部分，其實係多過就咁幫人哋已經包好晒去帶，咁呢個我要喺考慮之列。
可以講一個犯案嘅時候先得十六歲幾，而家先17歲，一個咁年輕嘅罪犯嚟到法庭度，法庭係需要判一個咁樣嘅人去坐監，唔係一件容易嘅事。不過喺一個咁嚴重嘅罪行，販運危險藥物咁嚴重嘅罪行，法庭係有一個職責要向公眾發出一個訊息，就係法庭係唔會姑息干犯咁嚴重罪行嘅人，即使係年輕，都一樣要去坐監。
本席當然明白到，就呢件嘅事件，你父母係幾傷心、幾難過，亦都幾憂心，但係本席嘅職責係需要喺呢件案件判被告人你一個恰當嘅刑期，我呢個責任係唔可以話因為我本人同情你父母或者同情你屋企人喺呢件事件所受嘅傷痛，而令到我唔履行我自己嘅責任去做。
被告人喺你自己嘅求情信都好坦白承認，知道而家自從失去自由之後生活係幾艱苦，曾經想過放棄自己，不過好彩屋企人同朋友都冇放棄到你。其實你自己真係好幸運，因為好多時有其他嘅被告人真係根本冇人再理佢，冇人嚟法庭，亦都冇人去探佢，連呢個屋企人已經放棄晒。你係第一次干犯控罪，你仲有機會，年紀仲係咁細，你應該係盡量去利用你喺獄中有機會讀書，或者有機會去學一技之長，將來返番出嚟係重新做人，報答你父母對你嘅養育深恩，同埋亦都報答番佢哋對你不離不棄呢一個咁樣嘅態度。咁呢個只不過我係希望你將來為你自己好，唔再係繼續犯案，但係呢個亦唔構成係話我認為嗰個罪行可以輕判，你要明白係兩回事。
咁我考慮咗呢件案件所有嘅案情，當然我明白到你一方面係你自己參與嘅程度，我亦都考慮到係你自己帶警察去搵番喺電線箱入面嘅毒品嘅，如果唔係嘅話，本來喺你身上搵到嗰兩包毒品嗰個份量唔係話咁多，咁我都喺呢個考慮之列。我亦都考慮到你嘅背景，你係第一次犯事，以前係冇案底，同埋你嘅年紀，我就認為一個恰當嘅量刑起點，即係兩條罪行加埋，所有嘅份量加埋嘅量刑起點，7年係恰當嘅，咁所以我係會以呢個7年作為量刑起點。被告人你係的確喺最早嘅時候，喺裁判署已經係承認控罪，咁所以可以得到一般嘅三分之一刑期扣減。
但係就頭先已經講咗，本席對話你屋企人，即係我明白到你屋企人呢件事件受到嗰個嘅影響，但係呢個唔構成再減刑嘅理由，本席亦都唔認為你本身覺得嗰個懺悔喺個獄中，即係失去自由呢一方面，係另外一個減刑嘅理由，三分一就係係得咁多喇。
以7年為起點，扣咗三分一嘅刑期扣減，就刑期係四年八個月嘅。咁點樣去分配呢？因為有兩項控罪，咁正式判刑：第一項控罪，本席就係判被告你要坐監兩年；第二項控罪係坐監四年八個月。兩項控罪係同期執行，咁即係話夾埋晒都係四年八個月。