情節方面，好簡單嘅啫。受害女子X係某連鎖式快餐店分店嘅清潔工，而被告就係同一分店嘅電單車速遞員，兩人喺案發前最少三個月開始所謂拍拖，起碼X喺口供嗰度係咁描述佢同被告嘅關係。無論如何，X同被告喺案發當日從公司缺席咗半天，原來就係去咗一間時鐘酒店發生性行為。
根據X喺口供透露，佢當時基本上係自願嘅，仲自行寬衣，與被告共浴，後來佢感到下體痛楚，先叫停被告。至於事件點揭發呢？就係X事後發惡夢，被母親追問下講咗出嚟。
X被臨床心理學家評定為輕度弱智，如果以語文智商（Verbal IQ）、作業智商（Performance IQ）同埋全量表智商（Full Scale IQ）計算，就分別有41、66同埋53分，亦即係話每一百個人，會有九十九至九十九點九個人，係喺呢三項入面高分過佢嘅。如果用實例嚟睇，佢就連認字、寫字、睇鐘、數錢都唔識嘅，講嘢更加只能夠用明白、極簡單嘅句子。
反之，被告現年50歲，仲有二十幾日就51歲，香港出生及受教育至中五程度，之後做過印刷、收費員等工作。此外，佢曾經有兩段婚姻，第二段嘅太太長居大陸，係內地人，最後喺04年以分居收場，之後再冇聯絡，之後被告就獨居於香港。最後，被告係冇任何刑事定罪紀錄嘅。
求情嗰個時候，律師話被告對X有真誠愛意，而且早喺09年12月，而唔係10年1月已經向X表白，之後管接管送，又送小禮物，所以雙方係真實嘅男女朋友關係。
總括而言，被告承認、亦都無可否認，佢知道或有理由相信X喺精神上冇行為能力，呢個相信任何人同X稍作相處，都係冇可能唔發現嘅，因此，被告話同X拍拖，佢嘅目的亦好難不令人懷疑。再講，就算X樂於同佢性交，呢個亦唔會對被告有啲咩嘢好大嘅幫助，因為法例要保障嘅，正正就係X呢一類人士，不會陷於自己冇能力，但係又作出過嘅抉擇嘅後果，唯一嘅係被告勉強都算同X交往過幾個月，行為、態度又令X視佢為自己嘅男朋友，所以相比於喺邂逅下，旋即將事主帶往性交嘅個案輕微得多嘅。
綜觀與案有關嘅所有因素，我認為本案量刑起點可以設定於較低嘅兩年半，被告認罪，可得三分一嘅扣減，就下調至20個月，即係一年零八個月。另外，由於被告嚟到呢個歲數都冇前科，犯案嗰時又失婚，我唔排除佢犯下本案嗰個時候係一時衝動，所以會將刑期再扣減五個月，至到15個月。