香港特別行政區 訴 陳家興

DCCC1030/2009

香港特別行政區

區域法院

刑事案件2009年第1030號

----------------

----------------

判刑理由書

----------------

1.被告人被控一項販運危險藥物罪，違反香港法例第134章《危險藥物條例》第4（1）（a）及（3）條。

2.罪行嘅詳情係話被告人陳家興於2008年12月25日在香港，非法販運危險藥物，即內含7.59克氯胺酮的9.21克粉末。

3.被告人原先就住呢個控罪係並不認罪嘅，佢爭議佢曾經作出招認嘅可接納性。法庭就採取交替程序去處理被告人曾經作出嘅各項招認嘅可接納性。控方係傳召咗警員33129出庭作供，而被告人亦都喺呢個交替程序裡面出庭作供，最終本席就係裁定就住交替程序特別事項，被告人所作出嗰啲招認，本席就係喺毫無合理疑點嘅情況下，裁定所有嘅招認都係自願作出，本席亦都拒絕運用本席剩餘嘅酌情權（residual discretion），去摒除呢一啲咁樣樣嘅招認。喺本席畀咗就住被告人招認嘅可接納性嘅裁決之後，被告人對呢個控罪就係認罪嘅。

4.有關被告人所承認嘅事實係話，喺2008年12月25日晚上10時30分左右，PC33129（控方第一證人）及其隊員喺旺角登打士街與東安街交界設立路障，當一部由被告人駕駛的客貨車EB4697經過時，警員截停該輛客貨車，當時車上還有一名男子坐在前排乘客座位，兩名女子坐在後排乘客座位。各人下車後，其中WPC（即係女警）56933（控方第二證人）向蘇詠珠進行搜身，並從蘇詠珠的胸圍搜出一個膠袋（蘇詠珠就係被告人所駕駛嘅EB4967其中一位女乘客）。咁喺蘇詠珠嘅胸圍裡面搜出一個膠袋，係載有懷疑氯胺酮，其後知道為內含7.59克氯胺酮的9.21克粉末（即證物P1）。蘇詠珠被拘捕和警誡，在警誡下，蘇詠珠說是被告人給她該等毒品的，控方第一證人因此向被告人作出調查。其後約在23：03時，控方第一證人向被告人宣布拘捕販運危險藥物罪及作出口頭警誡，在警誡下，被告人承認從一名叫阿強的人，為蘇詠珠購買該等氯胺酮。

5.2008年12月26日0時7分，控方第一證人在旺角警署內為被告人錄取會面紀錄。在警誡下，被告人回答「阿Sir，真係唔關我事，係佢話要先幫佢攞，我自己都唔食K仔。」有關毒品（即證物P1）經檢驗後確認為氯胺酮，內含7.59克氯胺酮的9.21克粉末。

6.被告人係有三項案底，其中有兩項係管有危險藥物罪，當時被告人喺2004年2月同埋7月分別就呢兩項嘅管有危險藥物罪，就係被判刑嘅。被告人喺1984年4月出生，佢而家係26歲，喺犯案嘅時候，佢已經係24歲。今日我聽到辯方律師求情嘅時候，講被告人係有一個對佢好支持嘅家庭，佢嘅兩位哥哥喺尋日審訊嘅時候亦都有出庭，而今日其中一位哥哥亦都有到庭。我亦都聽到辯方大律師所講，被告就係做咗而家呢一份工已經有8年，而而家，直到今日為止，都係受聘於呢間公司嘅。辯方律師亦都話畀我聽，本案原先就係排咗喺觀塘裁判署，09年5月嗰度進行審訊，但係因為當時就係裁判法院就係未有時間處理呢一宗案件，所以押後去到09年嘅8月。喺09年8月，喺觀塘裁判法院嘅時候，當時嘅原審裁判官就係表示咗一啲意見，引致到本宗案件就係轉介去到區域法院嗰度係進行審訊。而原先喺區域法院嘅時候，呢宗案件嘅審訊就排咗喺今年嘅2月，但係因為控方第一證人當時就係因病畀唔到證供，所以最終嗰宗案件亦都係押後去到今年嘅7月，喺本席面前進行審訊嘅。

7.根據許守城嗰個案例已經畀出嘅判刑指引，就住販運氯胺酮，嗰個份量如果係超過1克至到10克之間，係會判處兩年到到四年嘅監禁。喺而家呢一宗案件裡面，被告販運嘅係7.59克氯胺酮，我會採取3年嘅監禁作為量刑起點。有鑒於被告人喺處理完交替程序之後認罪，我會畀佢五分之一嘅量刑扣減，所以喺3年嘅起點裡面，再畀五分之一嘅扣減，應該係二十八點八個月嘅監禁。

8.咁由於本案就係分別押後咗一段時間，而並不在於被告人自己嘅過失，咁所以因此我亦都會再扣減多二點八個月，所以最終嗰個刑期，被告人係判處監禁26個月。