案情指被告喺羅湖入境之後，被關員截查，從佢所攜帶嘅掛肩袋內，搜獲十八包危險藥物，而有關嘅毒品經化驗之後，證實為內含223.24克甲基苯丙胺鹽酸鹽嘅245.44克晶狀固體，市值177,944元。
被告承認有人畀1,000鈫佢，要佢將嗰啲冰毒從深圳帶返香港荃灣一個小公園，放進樹叢內，但係佢尚未獲支付報酬。
被告現年49歲，有五項刑事紀錄，涉及十條控罪，其中兩項涉及危險藥物，最後一次嘅案底係喺1994年，因為管有危險藥物，被判罰款1,000元。
大律師喺求情嘅時候表示，被告同太太以及兒子本來居住喺深圳，而被告每日需要來回香港工作，太太與兒子喺上月取得單程證來港生活，可惜因為本事件，被告被拘留，經濟拮据，兒子只得返去太太家鄉生活。大律師續指，被告喺過去擔任過唔同種類嘅工作，但係因為入不敷支，足襟見肘，自己又係家中經濟唯一嘅支柱，受不住朋友嘅唆擺，先會鋌而走險，干犯本案。大律師希望本席能夠考慮被告嘅個人因素，予以輕判。
本席喺量刑嘅時候，考慮咗本案嘅案情、毒品嘅種類、重量、有關嘅量刑指引、被告認罪，以及大律師嘅求情。根據程國雄案嘅量刑指引，販運「冰」毒70至到300克，起刑點係10至到14年。就本案所涉及嘅223.24克「冰」毒，再加上跨境販毒，令案情嚴重嘅因素，本席認為13年嘅起刑點係適合，予以三分之一嘅量刑扣減，判刑八年八個月，104個月。