香港特別行政區 訴 梁鎮英

HCCC396/2010

香港特別行政區

高等法院

原訟法庭

刑事案件2010年第396號

----------------

----------------------

判刑
以下內容乃法庭數碼錄音謄本

----------------------

官： 被告承認兩項販運危險藥物罪，違反香港法例第134章《危險藥物條例》第4（1）（a）及（3）條。

案情指，警員喺一個大廈門口截停被告，搜身之後喺佢個褲袋搵到十一袋毒品。警誡下佢承認正在運送「K仔」去到彩霞邨，其後，警員到該大廈嘅519室，出示搜查令進入單位搜查之後，發現客廳有多袋毒品、多個可再封口膠袋同埋一個電子磅，警誡下被告承認毒品屬於佢所有，佢話佢獲取有關嘅毒品、可再封口膠袋，以及一個電子磅之後，按指示分拆成小包，正在運送途中被捕，佢話佢會收到1,000鈫作為報酬。毒品經過化驗之後，證實佢身上搜獲嘅危險藥物係內含92.16克氯胺酮嘅139.13克粉末，而喺佢單位內搜獲嘅危險藥物係內含299.48克氯胺酮嘅413.30克粉末。有關嘅危險藥物喺撿獲嘅時候嘅零售價估計為港幣65,198鈫。

被告現年19歲，過往並冇刑事紀錄。大律師喺求情嘅時候表示被告事發嘅時候因為失業，經濟壓力，經不起損友唆擺，所以干犯今次嘅嚴重罪行。被告喺求情信中已經表示佢深切反省，希望法庭能重輕發落，讓佢早日重投社會。

本席喺量刑嘅時候考慮咗本案嘅案情，毒品嘅種類、重量、有關嘅量刑指引、被告認罪、大律師嘅求情，亦都閱讀咗被告佢嘅前僱主、佢媽媽、姐姐，以及主日學導師所寫嘅求情信。根據許守城一案嘅量刑指引，販運300至到600克氯胺酮嘅起刑點係9至到12年，本案涉及嘅係391.64克嘅氯胺酮，本席以10年作為起刑點，予以三分之一嘅量到扣減判刑80個月，分配如下：

控罪一，4年；控罪二，80個月。同期執行。