香港特別行政區 訴 陳焯標

HCCC50/2011

香港特別行政區

高等法院

原訟法庭

刑事案件2011年第50號

----------------

----------------------

判刑
以下內容乃法庭數碼錄音謄本

----------------------

官：　被告早於裁判官席前承認過兩項販運危險藥物罪，分別涉及以淨含毒量計265.81克及33.89克嘅海洛英。

案情好簡單，警方先喺旺角東港鐵站截停被告，發現佢帶住控罪一（即係265.81克）嘅嗰批海洛英，之後到佢喺亞皆老街嘅寓所搜查，又發現控罪二（即係33.89克）嗰批。喺警誡下，被告最少承認過為錢同人運送控罪一嘅毒品，而家就承認晒兩項販運罪。

被告現年61歲，即將62，香港出生，並受教育至大專程度。工作方面，佢做過錄音員同貨倉主管，被捕前則無業，據稱係退休，靠儲蓄生活。

被告已婚，育有一子，應該係同另外一名女子所生嘅，但係已經與髮妻離異，案發時獨居。最後，佢自67年至今，總共有過七次前科，除咗一次管有危險藥物之外，都同本案嘅性質不同。

求情時，律師話被告喺昔日國民黨舊部集居嘅調景嶺長大，所以環境複雜，所以先會喺少年或者青年時期屢次犯案。相反，佢讀書嘅志向不滅，甚至完成過嶺南書院嘅一個課程，之後加入一個電影公司工作。多年之後，佢被遣散，就轉職倉務主管，至幾年前無力繼續擔當呢份工作，所以退休，以致婚姻出現問題，先至再犯下一生以嚟最嚴重嘅一次案件。

觀乎本案毒品嘅數量（即係合共299.70克嘅海洛英），一個總量刑基準應該係十三年半，不過我體諒被告嘅背景，酌情將呢個總基準下調6個月至13年，被告認罪，可得三分一嘅扣減，就下調至八年零八個月，不過之後就冇再其他嘅求情因素。

為達至呢個總數，我下令被告就控罪一入獄八年零八個月，就控罪二入獄四年零八個月。此外，控罪二同控罪一同期執行，合共八年零八個月。