香港特別行政區 訴 阮晉傑

HCCC417/2010

香港特別行政區

高等法院

原訟法庭

刑事案件2010年第417號

----------------

----------------------

判刑
以下內容乃法庭數碼錄音謄本

----------------------

官： 被告承認一項販運危險藥物罪，違反香港法例第134章《危險藥物條例》第4（1）（a）及（3）條。

案情指，被告被警員喺一個商場截查，從佢手持嘅紙袋內發現十四袋嘅毒品，被告當時承認嗰啲係「K仔」，但係表示係自己服用嘅。毒品經過化驗之後，證實係187.26克嘅粉末內含141.47克嘅氯胺酮，當時嘅零售價係20,785元。被告現在承認當時正在販運有關嘅毒品。

被告現年22歲，喺2011年1月13號，因為一項與未成年少女發生性行為罪，被判3個月嘅監禁，喺2月26日已經服刑完畢。

大律師喺求情嘅時候表示，被告嘅女友喺大約兩個多月前誕下小朋友，現在小朋友喺寄養家庭托管。被告喺2010年頭因為失業，而已染上毒癮，想賺快錢，支持毒癮，先至會鋌而走險，干犯本案。佢明白今次需要面對頗長嘅刑期，但係佢會喺出獄後積極工作，照顧女友及小朋友。

本席喺量刑嘅時候，考慮咗本案嘅案情、毒品嘅種類、重量、有關嘅量刑指引、被告認罪、大律師嘅求情，亦都閱讀咗被告、佢嘅家人、朋友所撰寫嘅求情信。

本案中被告牽涉嘅141.47克嘅氯胺酮，根據許守城案嘅量刑指引，係納入50至到300克，即係6至到9年嘅量刑界別。本席採取7年嘅起刑點，予以三分之一嘅認罪扣減，判刑56個月。